AVTOMOBİL YOLLARI DÖVLƏT AGENTLİYİ YOLUNUN ÜSTÜNDƏKİ HƏR ŞEYİ YERLƏ-YEKSAN EDİR – İNSAN VƏ VƏTƏNDAŞ HÜQUQLARINI DA
Azərbaycanda söküntülər müxtəlif formalarda baş verir. Dövlət əhəmiyyətli söküntülər zamanı sökülən ərazidə dövlət əhəmiyyətli işlər aparılarsa, həmin ərazinin söküntüsü və sakinlərin həmin ərazilərdən köçürülməsi məcburi sayılır. Dövlət əhəmiyyətli yolların və digər kommunikasiya xətlərinin çəkilməsi, sərhədboyu zolaqda dövlət sərhədinin etibarlı mühafizəsinin təmin edilməsi, müdafiə və təhlükəsizlik əhəmiyyətli obyektlərin tikilməsi, dövlət əhəmiyyətli dağ-mədən sənayesi obyektlərinin tikilməsi hallarında həmin ərazilərdə yaşayan sakinlərin başqa ərazilərə köçürülməsi və yaxud dövlətin tətbiq etdiyi kompensasiyaların sakinlər tərəfindən qəbul edilərək, köçməsi məcburidir. Digər söküntü halları isə Bakı şəhərinin müəyyən olunmuş rayonlarında Nazirlər Kabinetinin qərarı ilə sosial iqtisadi inkişafın sürətləndirilməsi ilə bağlı olaraq aparılır.
Dövlətimiz o qədər humanistdir ki, hətta “qırmızı xətt”in keçilərək inşa olunmuş evlərin də dövlət ehtiyacı üçün sökülməsi hallarında belə həmin ərazilərdəki tikintilər sənədsiz və icazəsiz olmasına baxmayaraq, ərazidəki sakinlərin evləri sökülən zaman, həmin sakinlərə dövlət tərəfindən kompensasiyalar verilir və yaxud evlə təmin olunurlar.
Lakin, cənab Saleh Məmmədovun rəhbərlik etdiyi Azərbaycan Avtomobil Yolları Dövlət Agentliyi dövlətimizin humanist siyasətini tanımır. “Korrupsiya və Qanun” qəzetinin redaksiyasına müracət edən vətəndaş Əliyev Emin Həmid oğlu bildirir ki, Bakı şəhəri, Səbail rayonu, Ü.Hacıbəyov küçəsi – 45, mənzil – 11 ünvanında qeydiyyatdadır və paytaxtın Xətai rayonu, S.Orucov küçəsində qarajı vardır. Qaraj yeri Xətai Rayon İcra Hakimiyyətinin 23.01.1992-ci il tarixli 122 saylı Sərəncamı ilə ayrılmışdır. AYD Agentliyi həmin sənədi heçə sayaraq, ərazidə başladığı yol genişləndirmə işinə görə qarajı sökmək istəyir. Qaraj sahibinin bildirdiyinə görə, qarşılığında ona qeyri-rəsmi olaraq 500 (beş yüz) manat “kompensasiya” təklif ediblər. Bu məbləğə isə şəhərin heç bir yerində qeyri-yaşayış yeri ala bilməz.
Hüquq müəyyənedici sənədlərlə qarajın Əliyev Emin Həmid oğlunun qanuni sahibliyində və istifadəsində olduğu üçün, həmin əmlakın ədalətli dəyəri ödənilmədən, əsassız olaraq sökülməsinə görə AYD Agentliyi vətəndaşa təkcə maddi deyil, həm də mənəvi ziyan vurmuş olacaq. Görəsən, hörmətli Saleh Məmmədov cənabları vətəndaş Emin Əliyevə təklif olunan beş yüz manatı nə dərəcədə ədalətli məbləğ hesab edir?
Mövzuya qayıdacağıq.

Korrupsiya-q.az