"Korrupsiya və qanun" qəzetinin əməkdaşı, hazırda Bakı 1 saylı İstintaq Təcridxanasında saxlanılan Quliyev Tağı Xatəm oğlu Astara rayon hüquq-mühafizə və cinayət təqibi orqanlarının, habelə Astara rayon məhkəməsinin ədalətsizliyi nəticəsində öz təqsirsizliyini sübut etmək məcburiyyəti qarşısında qalmışdır. Tağı Quliyevin Baş Prokurorluğun Analitik Şöbəsinə müraciət etmək hüququ da təcridxana rəhbərliyinin biganəliyi səbəbindən təmin olunmur.
Həmçinin, bildiririk ki, 15.11.2018-ci il tarixdə nömrəsi məlum stasionar telefonla baş redaktorumuza bir nəfər zəng vuraraq özünü Astara rayon prokurorluğunun əməkdaşı kimi təqdim etmiş, israrımıza baxmayaraq adını və vəzifəsini bildirməmişdir. Həmin şəxs əvvəlcə baş redaktorun Baş Prokurorluğa vurduğu teleqramla əlaqədar guya prokurorluğa dəvət olunduğunu, baş redaktorun isə prokurorluğa getmədiyini boynuna qoymağa çalışmışdır. Sonra da “səmimiyyətlə” istintaq sirrini bizimlə bölüşərək, Astara rayon rokurorluğunda Tağı Quliyevin bir vaxtlar psixi pozuntusu olmasına dair, onun kəmağıllığını ortaya qoyan tibbi arayışlar toplandığını demiş və bu hərəkətinin doğurduğu sualları ona verdikdə, cavablandırmaqdan yayınmışdır.
Odur ki, Tağı Quliyevin Baş Prokurorluğun Analitik Şöbəsində qəbul edilməsini, eləcə də Astara rayon prokurorluğu adından baş redaktora zəng açan şəxsin kimliyinin müəyyənləşdirilərək əməlinə hüquqi qiymət verilməsini və nəticə barədə redaksiyamızın məlumatlandırılmasının təmin edilməsi xahişi ilə Baş Prokuror cənab Zakir Qaralova məktubla müraciət etmişik. Hələ də cavab gözləyirik. Ötən hər gün isə T.Quliyevin məhkəməsini yaxınlaşdırır.
Xatırladaq ki, T.Quliyev Astara rayon mərkəzi xəstəxanasının baş həkimi Əlövsət Əliyev tərəfindən bir ildə iki dəfə şərlənmiş, keçən ilin mart ayına təsadüf edən birinci cəhd uğursuz alınsa da, məkr və saxtakarlıqla müşayiət olunan ikinci cəhd hüquq-mühafizə orqanları əməkdaşlarının tərəfkeşliyi ilə reallaşma üzrədir. Onu da qeyd edək ki, bu arada "Təzadlar" qəzetində Astara RMX-nın baş həkimi Əlövsət Əliyevin rəvac verdiyi neqativ hallar barədə tənqidi məqalə dərc olunub. Məqalədə həmçinin tibb işçilərindən Sənubər Rəcəbovanın da korruptiv əməllərindən bəhs olunur. O xanım da T.Quliyevə qarşı baş həkimin qurduğu şər-böhtan kampaniyasında iştirak etmişdir.
T.Quliyev Astara rayon məhkəməsinin 21.12.2018-ci il tarixli hökmündən Şirvan Apellyasiya Məhkəməsinə verdiyi apellyasiya şikayətində sifarişlə həbs olunmasını, uydurulmuş zərərçəkənlərə guya xəsarət yetirmək üçün istifadə etmiş olduğu kimi göstərilən əşyanın üzərində ekspertiza keçirilmədən "nəticə" çıxarıldığını, müstəntiqin onunla uydurulmuş zərərçəkənlər arasında faktiki üzləşmə aparmadan "üzləşmə aktı" tərtib etdiyini, insidentin (sözlü mübahisənin) baş verdiyi yerdə mövcud olan müşahidə kameralarında qeydə alınan görüntüləri çıxarmaq tələbinin yerinə yetirilməməsini, ilkin istintaq zamanı törətmədiyi cinayəti boynuna alması üçün uğursuz işgəncə və təzyiqlərə məruz qaldığını, onun guya təqsirini qismən boynuna alması barədə ifadə verdiyi haqda yalanın qərarda yazıldığını, uydurma zərərçəkənlərin və saxta şahidlərin ifadələrinin bir-biri ilə uyğunsuzluq təşkil etməsini, hüquqlarını müdafiə edən vəkilin vəsadətlərinin məhkəmədə təmin olunmamasını və məruz qaldığı başqa hüquqpozmaları qeyd etmiş, eləcə də özünün və ailə üzvlərinin qeyri-qənaətbəxş səhhət durumu və maddi vəziyyətlərinin nəzərə alınmasını xahiş etmişdir.
Ümid edək ki, bu sadalananlar apellyasiya instansiyası məhkəməsində nəzərə alınacaq.
[xfgiven_embed] [/xfgiven_embed]
[xfgiven_youtube][/xfgiven_youtube]
KİNLİ BAŞ HƏKİM
ASTARANIN BAŞ HƏKİMİ MÜXBİRİMİZİ BİR İLDƏ İKİNCİ DƏFƏ ŞƏRLƏDİ
