[b][/b]
Biləsuvar rayon Xanlar Qafarov adına İsmətli kənd orta məktəbinin müəllimlərinin əslini Təhsil nazirinə, surətini isə "Korrupsiya və qanun" qəzetinin redaksiyasına göndərdikləri üçüncü ərizədə məktəbin direktoru Ağamməd İbayevin qanunsuz əməlləri, əvvəlcə müəllimlər, sonra da şagirdlər arasında təfriqə yaratması barədə növbəti məlumatlar yer almışdır. Bu mövzuda qələmə aldığımız əvvəlki məqalələrdən xatırlatmalar verib oxucuları yormaq istəmirik. Yalnız təzə ərizədə ehtiva olunan yeni informasiyaları oxucuların müzakirəsinə buraxırıq:
"Ötən il sentyabrın 15-dən oktyabrın 5-nə kimi analıq məzuniyyətində olmuş ingilis dili müəllimi Nigar Mirzəyevanın bölünmə dərs saatlarının əksəriyyəti (11 a, 8 b, 6 a, 7 a, 9 b) keçirilmədiyi halda qanunsuz olaraq sinif jurnallarının yazılması halları mövcuddur. Direktor dərs dediyi 11 b sinfində dərs ilinin əvvəlindən indiyə kimi 33 saatdan çox dərs buraxmışdır (keçən il 147 saat). 2017-ci ilin sentyabrından indiyə kimi tədris planında orta məktəblərin 10-11 təmayül sinifləri üçün nəzərdə tutulmuş "nitq mədəniyyəti" dərsi bir dəfə də olsun keçirilməmiş və dərs cədvəlində də bu öz əksini tapmamışdır. Lakin qanunsuz olaraq jurnal yazılmış, əmək haqqı alınmış və alınmaqdadır. Görünür, direktorun başı özünə, müəllimlər və uşaqlar arasında qruplaşma, çaxnaşma, qarşıdurma yaratmağa elə qarışıb ki, bir daha dərs deməyi unudub. Belə olmasaydı, yaxınlarının İlhamə müəllimə haqqında tərtib etdikləri saxta imzalarla yazılmış, şər-böhtanla dolu ərizəni araşdırmadan "bax, budur sizə adekvat cavab, təsir əks-təsirə bərabərdir, 17 müəllim yalan danışa bilmirsə, 17 şagird də yalan danışa bilməz, sizi məhkəməyə verəcəyəm" - deyə təhsil şöbəsinin işçiləri yanında müəllimlərə hədə-qorxu gəlməzdi. Niyə məhz 17 şagird? - Bax, bu haqda düşünməyə dəyər!"
İndi isə direktorun saxta əməllərinə qarşı çıxdığına görə təhdidə məruz qalmış Alışanlı İlhamə müəllimənin redaksiyamıza göndərdiyi müraciətnaməni əlahiddə nəzərdən keçirək:
"Mən 2018-ci il dekabrın 22-də dərs dediyim X b sinfində haqsızlığa uğramışam. Özünü idarə edə bilməyən şagirdə dərsdə acıqlandığım üçün həmin şagirddən mənə qarşı istifadə etmişlər. Məktəbin direktoru İbayev Ağammədin baldızı Bəhmənova Güldanə və qızı İbayeva Nərmin həmin şagirdi öyrədərək, sinifdə mənə qarşı saxta imza toplamışlar. Mən heç bir şagirdi təhqir etməmişəm, heç bir müəllim haqqında təhqiredici ifadələr işlətməmişəm".
Keçid alaq İsmətli kənd məktəbində baş verən olayları müşayiət edən digər assosiasiyalara. Beləliklə, müəllimlərin imzası ilə Təhsil nazirinə ünvanlanmış şikayət məktubu 23 noyabr 2018-ci il tarixdə 13 saylı Ərazi Maliyyə Hesablaşma Mərkəzinin əmri ilə yoxlanılmışdır. Mərkəzdən verilmiş arayışda göstərilir ki, məktub şikayətçilərin iştirakı ilə araşdırılıb:
"Araşdırma zamanı məktəbdə pedaqoji kollektivlə söhbət əsnasında bəlli oldu ki, müəllimlərin əksəriyyəti rəhbərliyin idarəetməsindən, xarakterindən narazıdır. Bir qrup bitərəf olduğunu, digər bir qrup isə rəhbərliyə tərəf olduğunu bildirdi".
Arayışda yer alan bu cümlədəki "əksəriyyət" sözü o deməkdir ki, direktordan narazı olan müəllimlərin sayı 17-dən və hətta məntiqlə yanaşsaq 22-dən də çoxdur. Çünki məktəbdə 45 müəllim var. Əslində yaxşı direktor o kəsdir ki, hamı ona tərəf olmalıdır. Tutaq ki, narazılar məkrli adamlardır. Bəs bitərəflər necə? Onlar pisi-yaxşıdan ayıra bilməyəcək qədər müşahidəsizdirlərmi? Yaxud, məktəb kollektivinin atmosferini pozan bu qarşıdurmaya niyə laqeyd qalmalıdırlar ki? Bu nöqteyi-nəzərdən, bitərəfləri narazı olub da gözləmə mövqeyində duranlar hesab etmək olar.
Arayışdan oxuyuruq:
"Məktub 17 nəfərin imzası ilə yazılsa da, 12 nəfər müəllim imzasını təsdiqlədi. Onlardan bir nəfər - direktor müavini - Əliyev Fətağa Hacıbala oğlu vəzifəyə yeni təyin olunduğu üçün imzasını geri götürdü. Təbii ki, bu, belə də olmalı idi. Çünki yeni təyin olunmuş direktor müavini direktoru müdafiə etməli idi.
Sağlamlığı məhdud olan - evdə təhsil alan V sinif şagirdi Dövlətli Fatimə Rəfail qızına tədris planına uyğun olaraq 1 saat ingilis dili, 0,5 saat isə rus dili fənni tədris edilməli idi. Məktəbdə ingilis dili müəllimi olduğu halda Dövlətli Fatimə Rəfail qızına ingilis dili dərsi keçirilmir. Direktor bu dərsin pulunun ödənilmədiyini əldə əsas tutur. Lakin valideyn Dövlətli Rəfail qızına ingilis dili dərsinin keçirilməsini haqlı olaraq rəhbərlikdən tələb edir. Məktəbdə fərdi təhsilə cəlb olunan 2 nəfər V sinif şagirdi - Qaraşova Gülnarə Səlim qızı və Nərimanlı Güllübəyim Fizuli qızı ayrıca sinif otaqlarında fərdi qaydada təhsil almalı olduqları halda sinifdə şagirdlərlə birgə təhsil almalarına baxmayaraq onlar üçün məktəbdə xüsusi dərs saatlarına əsasən (hər birinə 9 saat) cədvəl tərtib olunub.
Məktəbdə fakültativ və dərsdənkənar məşğələ saatları məktəb həmkarlar təşkilatının, direktor müavinlərinin xəbəri olmadan direktora yaxın olan müəllimlər arasında rəhbərlik tərəfindən bölünmüş, şagirdlərin maraq və istəkləri nəzərə alınmamış, varislik qorunmamışdır.
Məktubda adları sadalanan texniki işçilərin - İbayeva Məhəbbət Adış qızının əvəzinə anasının işləməsi faktı təsdiqləndi. Cədvəldə adı dalandar gedən Rəhmanova Nəzirə Kazım qızı, axşamgözətçisi Hüseynova Nərminə İmran qızı, kiçik xidmətçi Hadıyev Rahim Mirəşrəf oğlu, ocaqçı Mirzəyev Alim Afil oğlu məktəbdə hansı vəzifəni yerinə yetirdiklərini, vəzifə funksiyalarını, adlarına olan bank kartlarındakı aldıqları əmək haqlarının məbləğini belə bilmədilər. Belə nəticəyə gəlmək olur ki, onların əmək haqlarını rəhbərlik özü tənzimləyir (Redaksiyadan: Yəqin arayışın mətnini hazırlayan şəxslər - N.Zərbəliyev, F.Cəbrayılova, T.Babayev mətndə "tənzimləyir" əvəzinə "mənimsəyir" sözünü yazmağa tərəddüd ediblər, Məhəbbət Adış qızının soyadının İbayev olmasına əlahiddə qiymət verməkdən çəkiniblər və yəqin ki, bu, onların direktora tərfdar olduqlarının deyil, özlərinin çox mədəni adam olduqlarının təzahürdür). Bu da işçilərin hüquqlarının rəhbərlik tərəfindən bilərəkdən pozulması halıdır.
Kollektivlə aparılan söhbət zamanı məlum oldu ki, məktəbin direktoru İbayev Ağamməd Teymur oğlu məktəbin idarə edilməsində bir sıra ciddi nöqsanlara (yumşaq ifadədir - müəllif.) yol vermişdir. Məktəbdə aparılan böyük summativ qiymətləndirmədə sualların hazırlanıb keçirilməsində metodbirləşmə rəhbərlərinin, fənn müəllimlərinin rəyi, fikri öyrənilməmişdir. Bütün qərarları tək özü vermişdir. Belə hərəkətlərinə görə müəllimlərlə rəhbərlik arasında qarşıdurma yaranmışdır. Kollektivdə sağlam mühitin olmaması məktəbdə qruplaşmaya səbəb olmuşdur. Təbii ki, bu da təhsilin keyfiyyətinə öz mənfi təsirini göstərmişdir".
Maraqlıdır ki, bunca ciddi qanunsuzluqlara qol qoyduğu təsdiqlənən direktor və havadarları, ələlxüsus da qardaşı oğlu Hüseyn İbayev (bu, başa düşüləndir) təkcə bir məsələni - şikayətçi müəllimlərinin sayının 17-dən 12-yə düşməsini (Bu, hələ o demək deyildir ki, 12 müəllim yalan danışır - müəllif.) qabardaraq qəzetin internet saytında gedən tənqidi yazıların altındakı "şərhlər" bölümündə istər öz adları, istərsə də qondarma adlar altında baş redaktorumuza hücum kampaniyası təşkil ediblər, şikayətçi müəllimlərin ünvanlarına təhqirlər yağdırır, yazı müəllifini savadsızlıqda, rüşvətxorluqda suçlayırlar. Rəylərindən məlum olur ki, onlar hətta qəzetimizin adına da dodaq büzürlər. Bunu da başa düşürük: Korrupsiyaya qurşananlar gec-tez qanun qarşısında cavab verəcəklərini bildikləri üçün adı ""Korrupsiya və qanun" olan qəzet onları əndişələndirməlidir. İş o yerə çatıb ki, moderatorumuz şərhlərdəki təhqiramiz ifadələri silib çatdıra bilmir. Şərhlərdə İbayevlər və tərəfdarları direktordan şikayət edən müəllimləri "razborkaya" dəvət edirlər. Belə davam edərsə, onlar haqqında artıq hüquq-mühafizə orqanlarına məlumat vermək və şərh bölümünü bağlamaq məcburiyyətində qalacağıq.
Xuraman Quliyeva
[xfgiven_embed] [/xfgiven_embed]
[xfgiven_youtube][/xfgiven_youtube]