Bakıda pişik sahibini xilas etdi - Özü yanaraq öldü

Bakı Ağır Cinayətlər Məhkəməsində ötən il mayın 19-da Binəqədi rayonu ərazisində hündürmərtəbəli yaşayış binasında baş vermiş yanğın hadisəsi ilə bağlı məhkəmə prosesi keçirilib. Milli.Az bizimyol.info-ya istinadən bildirir ki, hakim Əfqan Hacıyev sədrliyi ilə keçirilən iclasda zərəçəkmiş şəxslərin dindirilməsi davam etdirilib. Zərərçəkən Manafova Elmira deyib ki, bina hələ üzlənərkən üzlük materialın yanması halı baş verdiyi üçün iş bir müddət dayanmışdı. O qeyd edib ki, üzləmə zamanı vurulan materialın yandığının şahidi olub. "Qaynaq işləri zamanı alışmışdı. Lay şəklində qoparaq aşağı düşdü". Manafova əlavə edir ki, yanğın zamanı evdə yatmış olub. "3-cü mərtəbədə yaşayıram. Yatmışdım, məni pişik yuxudan oyatdı. Baxdım ki, hər tərəf tüstüdür. Pəncərədən qapqara tüstü dolmuşdu içəri. Əvvəl elə bildim ki, yanğın mənim evimdədir. Tələsik çıxmaq istədim. Amma blok da tüstü idi. Havasızlıqdan huşumu itirdim. Mənə qonşular kömək edib binadan çıxardılar".

Zərəçəkən qeyd edib ki, pişik onu oyadaraq xilas etsə də, özü içəridə yanaraq ölüb. Zərəçəkən Ruslan Əliyev bildirib ki, Fövqəladə Hallar Nazirliyinin Çevik Xilasetmə Xidmətində işləyib. "Bizim iş yeri "Əcəmi" metrostansiyası tərəfdədir. Məlumat daxil olan kimi binaya gəldik. Dedilər ki, 7-ci mərtəbədə qadınla uşaq qalıb. Oksigen balonu ilə yuxarı qalxdım. Gördüm ki, qadın artıq halsızdır, ağzından köpük gəlir. Öz oksigen maskamı bir neçə dəqiqəlik ona verdim. Sonra maskanı taxaraq onu binadan çıxardım. Aşağıda halım pisləşdiyi üçün özümdən getdim. Mənim özümü də xəstəxanaya yerləşdirdilər".



Zərəçəkən Anar Abdullayev bildirir ki, hadisə zamanı evdə nənəsi və uşaqlar olub, 11-ci mərtəbədə yaşayır. Özü pilləkənlə düşüb, nənəsi və uşaqları isə liftlə aşağı göndərib. "Hadisədə evimizlə yanaşı bahalı "Range Rover" avtomobilim də zərər görüb. Binadan çıxanda gördüm ki, yanan laylardan biri maşının üstünə düşdü. Maşını kənara çəkdim. Bu materialın yanan olduğu əvvəlcədən məlum olduğu üçün işi dayandırmışdılar. Mənə maraqlıdır ki, FHN icazə vermədiyi halda, şirkət hansı marağa görə sonradan həmin materialı vurmağa davam etdi? Yanğın başlayandan 4-5 dəqiqə sonra bina tam alışdı. Bu sakinlərin günahı nə idi axı?"

Vəkillərin suallarına cavab olaraq A.Abdullayev bildirib ki, yanğın zamanı FHN-in canlı qüvvəsi texnikadan daha səmərəli istifadə ediblər. "Xilasedicilər, yanğınsöndürənlər sağ olsunlar, özlərini oda atırdılar, kömək edirdilər. Texnika isə çox da işə yaramırdı. İlk gələn təcili yardım idi. Sonra polis ərazini nəzarətə götürdü, yalnız bundan sonra yanğınsöndürənlər gəldi".

Zərəçəkən Sahilov Orxan bildirib ki, yanğın zamanı evə tüstü dolduğunu görərək, tez sənədləri yığışdırıb evdən çıxmağa çalışıb. "Bloka çıxanda gördüm ki, tüstüdən nəfəs almaq olmur. Evə qayıdıb dəsmalı isladıb burnuma bağladım, birtəhər binadan çıxa bildim".

Vəkillərin sualına cavab olaraq zərərçəkən bildirib ki, binadan çıxan zaman yuxarı mərtəbədən özünü atan olduğunu eşitsə də, əraziyə buraxmadıqları üçün meyiti görməyib. O əlavə edib ki, bundan sonra ətrafdakı sakinlər daha bir nəfərin də binadan düşdüyünü deyiblər. Lakin həmin şəxsin kim olmasını bilmir. Vəkillərin sualları zamanı prokuror Fərid Nağıyevlə vəkil Məzahir Məmmədov arasında mübahisə yaradıb. Vəkil prokuroru prosesə müdaxilə etməkdə ittiham edib.

"Prokuror kimdir ki, nəyəsə müdaxilə edir, prosesi idarə edir burada? Hörmətli hakim, bəlkə yerinizi dəyişəsiniz? Onun savadı yazdığı ittihamdan məlumdur. Universitet müəllimini vəzifəli şəxs hesab edərək ittiham verib" - deyə vəkil bildirib. Hakim tərəfləri sakitliyə çağırıb. Mübahisə etdiyinə görə vəkilə xəbərdarlıq verərək, protokola qeyd olunmasını istəyib.

Zərərçəkənlərin ifadələri başa çatdıqdan sonra təqsirləndirilən şəxs - Binəqədi Rayon İcra Hakimiyyəti başçısının sabiq müavini Qəzənfər Ağayevin səhhətində problem yarandığı üşün prosesdə fasilə elan edilib və məhkəməyə təcili yardım çağrılıb. Yanğın hadisəsi ilə əlaqədar 8 nəfər təqsirləndirilir. Binaların üzlənməsində istifadə olunan "poliuretan" məmulatını istehsal edən "Qlobal Stone" və "Global Constuction" MMC təsisçisi Yusif Mahmudov, "Qlobal Stone" MMC-nin baş direktoru Uğur Bəşirov, "Global Construction" MMC-nin sədr müavini Ələkbər Əsgərov, 2012-2013-cü illərdə Binəqədi rayon mənzil-kommunal təsərrüfat birliyinin rəisi işləmiş rayon icra hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı mənzil-kommunal istismar sahəsinin rəisi Nizami Orucov və binanın poliuretan materialla üzlənməsi işlərinə nəzarət funksiyalarını həyata keçirməli olan, 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzov, Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları həbs qətimkan tədbiri seçilib. Bundan başqa, cinayət işinə "Dərnəgül Boru" Zavodunun laboratoriya rəhbəri Ağacavad Məmmədov və Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov da cəlb edilib. Onlar barəsində həbs-qətimkan tədbiri seçilməyib. Rəsmi məlumatlara əsasən, yanğın nəticəsində 15 nəfər ölüb, 50 nəfər xəsarət alıb. [xfgiven_embed] [/xfgiven_embed] [xfgiven_youtube][/xfgiven_youtube]