Bakıda qanunsuz tikintiyə görə kütləvi dava - FOTOLAR

Nəsimi rayonu, Cavadxan küçəsi 14 və 16-cı binaların idman meydançasının naməlum tikinti şirkəti tərəfindən hasaralanması sakinlərin etirazına səbəb olub. Şirkət sakinlərin etirazına məhəl qoymayıb, əraziyə ağır texnika yerləşdirib, günün sonuna qədər ərazidə texnika işləyib.

Ərazidə olan Bizimyol.info-nun əməkdaşının verdiyi məlumata görə sakinlər tikintini həyata keçirən iş içracılarından sənəd tələb ediblər. Sənəd təqdim edilmədiyi üçün narazı sakinlərlə tikintiyə nəzarət edən şəxslər arasında kütləvi dava baş verib. Əraziyə gələn polis əməkdaşlarının sakinlərin hüququnu qorumaq əvəzinə, sənəd təqdim etmədən ərazidə tikinti işi aparan şirkəti müdafiə etməsi onları hiddətləndirib.

Şikayətçilər bildirirlər ki, polis 4 nəfər sakini polis bölməsinə aparıb, izahatını alaraq buraxıb. Sakinlərin apardığı araşdırmaya görə, iki binanın arasında yerləşən həyət, uşaqların idmanla məşğul olduğu stadion zəbt olunaraq yaşayış binası tikilir. Əməkdaşımızla söhbətində ağır texnikanın idarə edən şəxslər burada kim tərəfindən nəyin tikilməsindən xəbərsiz olduqlarını deyiblər.

Sakinlər Prezident Administrasiyasına ilə Ailə, Qadın və Uşaq Problemləri üzrə Dövlət Komitəsinə müraciət edərək pozulmuş hüquqlarının bərpa olunmasını tələb ediblər.


[xfgiven_embed] [/xfgiven_embed] [xfgiven_youtube][/xfgiven_youtube]