Əməkdaşımız xalq şairinin barelyefinin izinə düşdü - Nazirlik məsələni nəzarətə götürdü...

Əməkdaşımız xalq şairinin barelyefinin izinə düşdü, Nazirlik məsələni nəzarətə götürdü.
İlk öncə onu bildirək ki, yanvarın 28-də xalq şairi Vaqif Səmədoğlunun ölümündən dörd il ötdü. Məsələ ilə bağlı saytımıza danışan V.Səmədoğlunun həyat yoldaşı Nüşabə xanım Vəkilova bildirmişdi ki, o, şairin adının əbədiləşdirilməsi üçün əlindən gələni edir, kitablarını çap etdirir. Amma bir məsələ odur ki, üç il yarımdan artıqdır sərəncam verilməsinə baxmayaraq, xalq şairinin barelyefi yaşadığı evə vurulmur.
Məsələnin izinə düşən əməkdaşımız ilk olaraq, Azərbaycan Yazıçılar Birliyinə müraciət edib. AYB-nin birinci katibi, xalq şairi Fikrət Qoca saytımıza bildirib ki, bu onların qurumuna aid olan məsələ deyil. Pulu kim alıbsa, getsin barelyefi də təyin olunan yerə vursun. Xalq şairi açıqlamasında bu sərəncamın Mədəniyyət Nazirliyinə aid olduğunu bildirib. Bu dəfə əməkdaşımız Mədəniyyət Naziliyinə müraciət edib. Nazirlikdən bildirilib ki, artıq problem nəzarətə götürülüb, araşdırılır. Tez bir zamanda problemin həlli ilə bağlı saytımıza açıqlama veriləcək.
Ümidvarıq ki, aidiyyəti qurumlar Səməd Vurğun kimi bir şairin ailəsində doğulan Vaqif Səmədoğlunun xatirə lövhəsi ilə bağlı məsələni tez bir zamanda həll edərək, poeziya sevərləri sevindirəcək.
Məsələ diqqətimizdədir... [xfgiven_embed] [/xfgiven_embed] [xfgiven_youtube][/xfgiven_youtube]