Yol polisi sürücüyə fiziki güc tətbiq edə bilər?...

Bir neçə gün öncə “Naz Lifan” markalı avtomobillə bir neçə küçə və prospektlərdə xidmət aparan Yol Patrul Xidmətinin (YPX) əməkdaşlarının verdiyi "Saxla!" əmrinə tabe olmayan sürücü saxlanılmışdı.
Əmrə tabe olmayan sürücünün idarə etdiyi avtomobili iki YPX ekipajı təqib edib. Avtomobil "tələ əməliyyatı" ilə Nobel prospektində saxlanılıb. Avtomobil saxlanıldıqdan sonra sürücü qaçmağa cəhd göstərsə də, YPX əməkdaşlarının sayıqlığı nəticəsində tutularaq məhkəmə orqanlarına təhvil verilib. Qaçmağa cəhd edən sürücünün saxlanılması zamanı qeydə alınan görüntülərdə polis əməkdaşlarının fiziki güc tətbiq etmələri müşahidə olunur. Bu görüntülər birmənalı qarşılanmayıb.
Yol polisinin fiziki güc tətbiq etməsi doğrudurmu?
Məsələ ilə bağlı Modern.az-a danışan Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev deyib ki, polisinin saxla tələbinə əməl qoymursa, qaçıb getmək istəyirsə, o halda polis əməkdaşının fiziki qüvvə tətbiq etmək səlahiyyəti var.
Bunun fərqi yoxdur, həmin polis YPX əməkdaşıdır, Post Patrul xidmətinin və ya Çevik Polis Alayının əməkdaşıdır. “Polis haqqında” qanunda konkret göstərilir ki, hansı hallarda polis əməkdaşı fiziki qüvvədən istifadə edə bilər, hansı hallarda odlu silahdan istifadə edə bilər. Bunların hamısı “Polis haqqında” qanunla tənzimlənir”.


Qafar Ağayev