"KORRUPSİYA VƏ QANUN" QƏZETİ KEÇMİŞ ƏMƏKDAŞININ QANUNSUZ ƏMƏLLƏRİNƏ CAVABDEH DEYİL

Yəqin, oxucularımızın çoxu "Bəxt üzüyü" bədii filmindəki polis görəndə allergiyası qalxan Qosplan Rasimi xatırlayarlar. "Korrupsiya və
Qanun" qəzetinin adı da həmişə cəmiyyətdə rast gəlinən korrupsiya hüquqpozmalarına rəvac verən vəzifəli şəxslərdə allergiya doğurub. Etiraf edirik, qəzetin adı həmçinin redaksiya heyətini jurnalist peşəsi, müxbir vəsiqəsi ilə möhtəkirlik etmək istəyənlər üçün cazibədar olub və bu da təbiidir. Bəziləri düşünüblər ki, bu yolla korrupsioner məmurların əldə etdikləri haram kapitala şərik ola bilərlər. Doğrudur, redaksiya rəhbərliyi daim kollektivə təsadüfi adamların soxulmasının qarşısını almaq üçün ayıq-sayıq olmağa çalışıb. Lakin boynumuza alırıq ki, bəzən maskalanmış belə adamları tanımaqda çətinlik çəkmişik. Belə səhvlərdən heç bir idarə, müəssisə, təşkilat, hətta nazirlik sığortalanmayıb. Redaksiya kollektivi öz daxilində də korrupsiyaya qarşı mübarizə aparır. Etimad göstərib ictimai əsaslarla müxbir götürdüyümüz Zaqatala rayonunun Faldar kənd sakini Durmuşov Sadiq Fəxrəddin oğlu da vəzifəsindən sui-istifadə etmiş, törətdiyi cinayət əməli ilə dərgimizin nüfuzunu zərbə altında qoymuşdur. Belə ki, o, 25 oktyabr 2016-cı il tarixdə vətəndaş Nuriyev Eldəniz Vəkil oğlunu "Sokar" şirkətinə işə düzəldəcəyini vəd edərək ondan 1000 manat, 01 yanvar 2017-ci il tarixdə isə Şirinov Şiraslan Qaməddin oğlunu onun oğlu Rəşadı "Korrupsiya və Qanun" qəzetinə işə düzəltmək adı ilə 2000 manat pul almışdır. Verdiyi vədə əməl etmədiyini, aldığı pulu qaytarmadığını görən borc yiyələri Sadiqin dələduzluq əməllərindən polisə şikayət etmişlər. S. Durmuşov barəsində edilən şikayətlərdən sonra ziyan vurduğu şəxslərin pulunu qaytarmış, onlar da öz növbələrində ona qarşı heç bir şikayət və tələblərinin olmadığını bildirmişlər. Nəsimi rayon Məhkəməsi 21 iyul 2017-ci il tarixdə Durmuşovun AR Cinayət Məcəlləsinin 178.2.2-ci maddəsində nəzərdə tutulan cinayət əməlini törətməkdə təqsirli bilsə də, bəzi yüngülləşdirici halları nəzərə alıb üzərində 3000 manat məbləğində cərimə cəzası saxlamışdır. Lakin S. Durmuşov dələduzluq əməllərinə son qoymamış, onun barəsində açılmış cinayət işinin istintaqının getdiyi vaxtda belə qəzetin adından sui-istifadə etməklə, ayrı-ayrı vətəndaşları aldatmaqda davam etmişdir. Bu əməlləri onunla nəticələnmişdir ki, aldatdığı şəxslər ondan pullarını geri istədikdə, pulu qəzet rəhbərliyinə verdiyini deməkdən başqa çarəsi qalmamışdır. İş o həddə çatmışdır ki, borc yiyələrindən ikisi - İbrahimov Vaqif Məhəmməd oğlu və Mamedov İlham Həmzət oğlu 01.07.2017-ci il tarixdə Zaqatala-Balakən rayonuna ezamiyyət məqsədilə getmiş baş redaktorumuzun idarə etdiyi, Sumqayıt şəhər sakini vətəndaş Dadaşov Ceyhun Xıdır oğluna məxsus avtomobili girov götürməyə cəhd etmişlər. C. Dadaşov 07.07.2017-ci il tarixdə avtomobilin dalınca getdiyi zaman Sadiq Durmuşov onu sillə ilə vurmuşdur. Mübahisə etdikləri vaxt polisin müdaxiləsi nəticəsində Ceyhun Sadiqin borclu olduğu şəxslərdən avtomobilin açarlarını almağa müvəffəq olmuşdur. Elə həmin gün C. Dadaşov döyüldüyü barədə Zaqatala rayon Polis Şöbəsinə şikayət etmiş, lakin yerli polisin və yerli məhkəmə tibb ekspertlərinin Sadiq Durmuşova iltifat göstərmələri səbəbindən döymə faktı "təsdiqini tapmamışdır". Beləliklə, Zaqatala polisi C.Dadaşovun müraciəti əsasında toplanmış material üzrə cinayət işinin başlanılmasını rədd etmişdir. Halbuki, Zaqatala RPŞ Durmuşovun barəsində hərtərəfli araşdırma aparsaydı, həmin vaxt onun cinayət işinin Bakı şəhəri Nəsimi RPİ-də və Nəsimi rayon prokurorluğunda istintaq edildiyini öyrənərdi. Yeri gəlmişkən qeyd edək ki, V. İbrahimov və İ. Mamedov Zaqatala polisinə verdikləri ifadələrdə pulun onlardan hər hansı vəd olunan vasitəçilik işi müqabilində deyil, məhz borc olaraq alındığını bildirmişlər. Ezamiyyətdə olan qrupumuzun Zaqatala - Balakən bölgəsinin sosial, iqtisadi, ictimai həyatı barədə topladığı materiallar əsasında qəzetimizdə xeyli məqalələr dərc olunmuşdur. S. Durmuşovun yaşadığı bölgədə başqa vətəndaşları da aldada biləcəyini istisna etmədiyimizdən, ezamiyyətdə olduğumuz vaxtlarda bu istiqamətdə də araşdırmalar apardıq. Öyrəndik ki, doğrudan da onun yalan vədlərinə inanan sadəlövh vətəndaşlar az olmayıb. Onlardan Zaqatala rayonunun Danaçı kənd sakinləri Ruslan və Nəsib Abakarovlar, Mais Makarov, Məryəm Makarova, İlqar Vaşiyev, Yusif Mahmudov, Ahmad Uluxanov, Şahid Yumulov 11.09.2017-ci il tarixdə redaksiyamıza ərizə ilə müraciət edərək, Zaqatala rayonunun Faldar kənd sakini Sadiq Durmuşovun son 4-5 ay ərzində onlara ünvanlı sosial yardım, müavinət, sürücülük vəsiqəsi düzəldəcəyini, evi qəzalı vəziyyətdə olan şəhid ailəsi üçün köməklik göstərilməsinə nail olacağını və s.konfidensial xidmətlər vəd edərək, müxtəlif məbləğlərdə pullar aldığını və mənimsədiyini bildirmişlər. Ərizənin redaksiyamıza daxil olduğu günün ertəsi gün, yəni, 12.09.2017-ci il tarixdə S.Durmuşov işinin qəlizləşdiyini duyduğundan, əks-hücuma keçmiş, baş redaktorumuzun oğlunun guya onu ölümlə hədələdiyi barədə DİN-nin "102" xidmətinə məlumat vermişdir. Biz bu barədə Zaqatala rayon prokurorluğunu məlumatlandırdıq. Rayon prokurorunun məsələyə konstruktiv müdaxiləsi sayəsində qərəzli böhtanı araşdıran Zaqatala RPŞ ortada heç bir sübut olmadığından, Durmuşovun müraciəti əsasında toplanmış material üzrə cinayət işinin başlanılmasını rədd etmişdir. Qəzetdə tutduğu vəzifədən azad edilməsinə baxmayaraq, S. Durmuşov hələ də jurnalist vəsiqəsini redaksiyaya təhvil verməmişdir. Vəsiqədən sui-istifadə edəcəyi ehtimalı barədə Zaqatala RPŞ-nə 01.08.2017-ci il tarixdə məktub da göndərmişik. S.Durmuşov polisə yalan məlumat vermişdir ki, guya vəsiqəni redaksiyada baş redaktora təhvil vermişdir. RPŞ-nin 06.10.2017-ci il tarixli cavab məktubundan bəlli olur ki, polis ona inanmış, redaksiyadan ona sənədi təhvil verməsini təsdiqləyən qəbz verilib-verilmədiyini soruşmamış, məktubumuzda yer alan digər xüsusatları da məhkəmə predmeti hesab edib araşdırmamışdır. Beləliklə, S. Durmuşov hüquq-mühafizə, cinayət təqibi orqanlarının, məhkəmənin ona humanist münasibətinə sözün əsl mənasında nankorluq edərək, dələduzluq cinayətlərini təkrar-təkrar törətməkdə davam etmişdir. Cinayətinin xarakterini, ictimai təhlükəlilik dərəcəsini nəzərə alaraq onun barəsində bir an öncə həbs qətimkan tədbirinin görülməsini vacib hesab edirik. Birinci məhkəmədə S. Durmuşov ilk dəfə törətdiyi cinayət əməlini könüllü etiraf edərək səmimi peşmançılıq hissi keçirdiyini bildirmişdir. Görək bu dəfə nə deyəcək!..

“Korrupsiya və qanun”