İrəvan meriyasında yeni qayda: Videolarda Ağrı dağı əks olunmamalıdır

İrəvan meriyasına içərisində Ağrı dağının (Ararat) görüntüləri olan video materialların yayımlanmaması barədə xüsusi göstəriş verilib. Əgər kadrlarda bu dağ əks olunubsa, müxtəlif şöbələrə həmin videonun silinməsi və dağın görünmədiyi yeni versiyanın hazırlanaraq paylaşılması tapşırılıb.

Bu barədə Ermənistan mediası xəbər verir.

Bildirilir ki, Ermənistan hakimiyyəti ölkəyə giriş və çıxış zamanı pasportlara vurulan möhürlərin üzərindən də Ağrı dağının təsvirini də ləğv edib.

Yeni pasport nümunəsində isə Xor Virap monastırı elə bir bucaq altından təsvir edilib ki, sözügedən dağ görünməsin. Ermənistanın Baş naziri Nikol Paşinyan tez-tez "bizim dağımız Araqatsdır" ifadəsini işlədir və onun iqamətgahındakı zalların birində məhz Araqats dağının böyük şəkli asılıb.