Astarada partlamamış top mərmisi zərərsizləşdirildi

Astara rayonunun Ərçivan kənd sakini Nahid Qulamov həyətyanı torpaq sahəsində kanaltəmizləmə işləri görərkən döyüş sursatı aşkarlayıb. APA TV-nin Cənub bürosunun xəbərinə görə, Nahid Qulamov tapıntı barədə dərhal Astara Rayon İcra Hakimiyyətini və Fövqəladə Hallar Nazirliyinin (FHN) Böhran Vəziyyətlərində İdarəetmə mərkəzini məlumatlandırıb.

Ərazilərin Minalardan Təmizlənməsi üzrə Milli Agentliyin (ANAMA) xüsusi əməliyyat qrupu dərhal Astara rayonuna ezam olunub. Qrup tərəfindən Ərçivan kənd sakini Nahid Qulamovun həyətyanı torpaq sahəsinə baxış keçirilirkən oradan 1 ədəd partlamamış hərbi sursat -122-mm-lik top mərmisi aşkar edilib. Mərminin üzərində isə döyüş başlığının olduğu müəyyənləşdirilib.
ANAMA-nın əməliyyat meneceri Böyükağa Haqverdiyev aşkarlanan hərbi sursatın tam işlək vəziyyətdə və təhlükəli olduğunu, vaxtında müvafiq qurumlara xəbər verilmədiyi təqdirdə hər hansı bədbəxt hadisənin baş verəcəyinin istisna edilmədiyini bildirib.


Qeyd edək ki, top mərmisinin həyətyanı əkin sahəsinə nə vaxt və hansı şəraitdə gətirilib basdırıldığı məlum deyil. Yerli sakinlərin sözlərinə görə, həmin ərazidə postsovet dövründə yerli sovxoza məxsus kənd təsərrüfatı texnikası saxlanılıb.

Aşkarlanan hərbi sursat təhlükəsizlik tədbirləri çərçivəsində mütəxəssislər tərəfindən xüsusi qaydada partladılaraq zərərsizləşdirilib.