Beynəlxalq Muğam Mərkəzi “Unudulmayanlar” layihəsi çərçivəsində Azərbaycan xanəndəlik məktəbinin bənzərsiz simalarından biri, Xalq artisti Seyid Şuşinskinin anadan olmasının 130 illiyinə həsr edilmiş tədbir keçirəcək.
Mərkəzdən AzVision.az -a verilən məlumata görə, tədbir Prezident İlham Əliyevin görkəmli xanəndənin 130 illik yubileyinin keçirilməsi ilə bağlı 4 fevral 2019-cu il tarixli Sərəncamına əsasən reallaşacaq.
Mədəniyyət Nazirliyi və İctimai Televiziyanın dəstəyi ilə gerçəkləşəcək yubiley gecəsində Seyid Şuşinskinin bənzərsiz sənət dünyasından söz açılacaq, muğam ustadları sənətkarla bağlı xatirələrini bölüşəcəklər. Tədbirdə həmçinin tanınmış xanəndələrin ifasında muğam dəstgahları səsləndiriləcək.
Qarabağ xanəndəlik məktəbinə mənsub qüdrətli sənətkar Seyid Şuşinski xalqımızın mənəvi dünyasının formalaşmasında müstəsna əhəmiyyət daşıyan qədim muğam ənənələrimizi layiqincə qoruyub yaşadıb. Geniş diapazonlu nadir, ecazkar səsə və yüksək səhnə mədəniyyətinə malik böyük muğam ustası təkrarolunmaz mükəmməl ifaçılıq nümunələri ilə Azərbaycanın musiqi xəzinəsini daha da zənginləşdirib. Seyid Şuşinski müəllim kimi uzun illər ərzində istedadlı musiqiçilərin yetişdirilməsi sahəsində də təqdirəlayiq fəaliyyət göstərib.
Seyid Şuşinski ifa üçün mürəkkəb muğam olan “Cahangah”ı xüsusilə böyük məharətlə oxuyub, özü də həmişə onu “mayə”dən deyil, “Mənsuriyyə”dən başlayıb. Məhz bu ustalıqlarına görə Azərbaycan muğam tarixinin əfsanələrindən olan Cabbar Qaryağdıoğlu onu “Şərq musiqisinin incisi” adlandırıb.
Yubiley tədbiri 29 may saat 19:00-da keçiriləcək. Konsertə giriş sərbəstdir.
Xalq Artisti Afaq Bəşirqızının 60 illik yubileyi qeyd olunacaq
Tanınmış muğam ifaçısı dünyasını dəyişdi
Semed Vurğunun 110 illik yubileyi keçirilib – Sumqayıtda
Xalq artisti: "İşğalla barışmayacağıq"
Məhəmməd Əmin Rəsulzadə -133
