Görək, Şirvan apellyasiya məhkəməsi Astarada qonşunun torpağını “dızd” eləyəni neyləyəcək

Astara rayonunun Çayoba kəndinin ən ilk adı Dızdəvişə (talışca "dızd" - oğru, "vişə" - meşə) olmuş, Sovet hakimiyyəti illərində Telman adlanmışdır. 29 may 2015-ci ildə Azərbaycan Respublikasının Milli Məclisinin qərarı ilə Pensər kənd inzibati ərazi dairəsi tərkibindəki Telman kəndi Çayoba kəndi adlandırılmışdır.
Deyəsən, Azərbaycan xalqının sözün həqiqi mənasında əziz-girami etnik qruplarından olan talışların o “dızd” dedikləri oğrulardan indi də qalır. Özü də vəzndə yüngül və daşına bilən şeyləri yox, torpaq (ərazi) oğruları. Bu günlərdə redaksiyamıza Astara rayonunun Çayoba kəndində anadan olmuş, Bakı şəhəri, S.S.Axundov küçəsi. Ev 1B, mənzil – 101 ünvanda qeydiyyatda olan və yaşayan Əliyev Zamin Ağali oğlu müraciət edərək qarşılaşdığı problemin kütləvi informasiya vasitəsində ictimailəşdirilməsini, həlli üçün aidiyyati orqanlara çatdırılmasını xahiş etmişdir. Zamin Əliyev bildirir ki, Çayobada onun ailə üzvlərinə vaxtilə dövlət tərəfindən ayrılmış və qanuni sənədlərlə onlara məxsus 1,05 hektar pay torpağın bir hissəsi Əliyev Polad Qeybi oğlu tərəfindən qeyri-qanuni olaraq zəbt edilmişdir. Nəticədə aralarında mübahisə düşmüş, hazırda iş Şirvan Apellyasiya Məhkəməsindədir.
Ümid edirik ki, apellyasiya instansiyası məhkəməsi işə ədalətli yanaşacaq. Həmçinin, tərəfimizdən müvafiq instansiyalara, o cümlədən, Əmlak Məsələləri Dövlət Xidmətinə sorğu məktubları göndəriləcək.
Xuraman Quliyeva