Umayra Tağıyeva: "İri infrastruktur layihələri təbiət üzərində əlavə təzyiq yaradır"

"Azərbaycan Respublikasının 2022-2026-cı illərdə sosial-iqtisadi inkişaf Strategiyası" və onun 2030-cu ilə qədər uzadılması çərçivəsində, həmçinin "Böyük Qayıdış" proqramı daxilində azad edilmiş ərazilərdə hava keyfiyyəti monitorinq sisteminin çoxriskli erkən xəbərdarlıq sisteminin bir hissəsi kimi yaradılması iqlim dayanıqlılığı üçün vacib uyğunlaşma tədbiri kimi müəyyən edilib".

Oxu.Az xəbər verir ki, bunu ekologiya və təbii sərvətlər nazirinin müavini Umayra Tağıyeva Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Yeni Şəhərsalma Gündəliyinə Həyat Vermək: Hava Keyfiyyətinin və Yaşıl İnfrastrukturun Dayanıqlı Şəhərlərə inteqrasiya edilməsi" adlı konfransda deyib.

O bildirib ki, təmiz hava və dayanıqlı şəhərlər inteqrə olunmuş şəhər həlləri tələb edir:

"Şəhər meşələri, yaşıl dəhlizlər, parklar və təbiətəsaslı həllərdən ibarət yaşıl infrastruktur şəhər istiliyinin azaldılması, çirkləndiricilərin tutulması, biomüxtəlifliyin artırılması və həyat keyfiyyətinin yaxşılaşdırılmasında mühüm rol oynayır. Aydındır ki, iri infrastruktur layihələri təbiət üzərində əlavə təzyiq yaradır və buna görə də təbiətin qorunması tədbirləri inkişaf fəaliyyəti ilə paralel həyata keçirilməlidir. Vətəndaş cəmiyyəti və özəl sektorun fəal iştirakı da xüsusi əhəmiyyət daşıyır".

O bildirib ki, şəhər dayanıqlılığı, ictimai sağlamlıq və davamlı inkişaf kontekstində təmiz hava artıq yalnız ekoloji məsələ deyil. Bu, iqtisadi məhsuldarlıq, sosial bərabərlik, iqlim dəyişikliklərinin qarşısının alınması və onlara uyğunlaşma, eləcə də insan rifahı məsələsinə çevrilib:

"Bu baxışın reallaşdırılması hava keyfiyyətinin idarə olunmasının şəhərsalma planlaşdırılması, nəqliyyat sistemləri, enerji siyasəti və yaşıl infrastrukturun inkişafı ilə inteqrasiyasını tələb edir".