Gürcüstanın qaranlığa qərq olmasının səbəbi: İlkin hesabatda Azərbaycanın adı çəkildi

İyulun 24-də Gürcüstanda baş verən miqyaslı elektrik kəsintisinin səbəbi ölkənin enerji sisteminin Azərbaycan enerji sistemindən ayrılması ola bilər.

Bu barədə Gürcüstanın Energetika və Su Təchizatının Tənzimlənməsi üzrə Milli Komissiyasının aralıq hesabatında bildirilib.

Hesabatda qeyd olunub ki, 24 iyul 2026-cı il tarixində Gürcüstan enerji sistemi 330 kilovoltluq elektrik ötürmə xətləri vasitəsilə Azərbaycan enerji sistemi ilə paralel rejimdə işləyirdi.

"Təxminən saat 00:10:49-da Gürcüstan enerji sisteminin Azərbaycan enerji sistemindən ayrılması baş verdi və ölkənin enerji sistemi təcrid olunmuş rejimə keçdi. Bundan sonra tezlik və gərginlik azalmağa başladı. Göstəricilər kritik həddə çatdıqdan sonra həm elektrik stansiyalarının, həm də istehlakçıların kaskad şəkildə enerjidən ayrılması baş verdi. Nəticədə, enerji sistemi tamamilə söndü", - deyə sənəddə bildirilir.

Bununla əlaqədar komissiya iki əsas məsələnin araşdırıldığını vurğulayıb:

- Azərbaycanın enerji sistemindən ayrılmaya nəyin səbəb olduğu;

- Gürcüstan enerji sisteminin təcrid olunmuş rejimdə sabit işləmək imkanına malik olub-olmaması.

Xatırladaq ki, iyulun 24-25-də Gürcüstanda genişmiqyaslı elektrik kəsintisi qeydə alınıb.