Namaz qılmağı öyrədən “sehrli” xalçalar satışda - FOTOLAR

Namaz qılmağı öyrədən elektron xalçalar satışa çıxarılıb.
Korrupsiya və Qanun saytı Rusiya mediasına istinadla verdiyi xəbərə görə, Tayvanda istehsal olunan “ağıllı” canəmazlar artıq Qırğızıstanda da satışa çıxarılıb.
Bu xalçaların köməyi ilə ibadətə yeni başlayanlar namazın əsaslarını asanlıqla mənimsəyə biləcəklər. Canəmaz xüsusi hissiyyatlı ötürücülərlə (sensorlarla) təchiz edilmişdir ki, bunların köməyi ilə rəkət saylarında çaşmamaq və bütün hərəkətləri düzgün icra etmək mümkün olacaq. Eləcə də onun üzərinə ibadətdə oxunan Quran surələri və duaları səsləndirən audiopleyer də bərkidilmişdir.
Canəmazı həm qadın, həm də kişilərin istifadəsi üçün uyğun proqrama kökləmək də mümkündür.
“Sehrli” namaz xalçasının qiyməti 1700 qırğız somu, yəni hazırkı kursla təxminən 43 AZN, yaxud 25 dollardır.