Koronavirusla bağlı ŞAD XƏBƏR - Təhlükə bu vaxta kimi yoxa çıxacaq

Qonşu ölkələr olan Türkiyə, Gürcüstan və İranda artıq koronavirusun yeni mutasiyaya uğramış SARS-CoV-2 növünə yoluxma faktı qeydə alınsa da bizim respublikada bu aşkar edilməyib.
Bunu Milli.Az-a açıqlamasında ATU-nun Tədris Cərrahiyyə Klinikasının Yoluxucu xəstəliklərə nəzarət şöbəsinin müdiri Sədrəddin Atakişiyev deyib. İnfeksionist-hepatoloq koronavirusun yaya kimi öldürücülük təsirinin itəcəyini bildirib:
"Ölkəmizə xaricdən gələn hər bir kəsin üzərində nəzarət, profilaktik nəzarət və kontrol müayinədən keçmə gücləndirilib ki, koronavirusun bu növü respublikaya daxil olmasın. Bu gün də şükür Allaha, belə bir fakt yoxdur. Bu, koronavirusun mutasiyaya uğramış bir formasıdır. Onun qarşısını almaq üçün dövlət lazımi profilktik və əks-epidemik tədbirləri görür. Xaricdən ölkəyə daxil olan bütün şəxslərin hamısı ciddi yoxlamadan keçirildikdən sonra ölkəyə daxil ola bilirlər. Koronavirusun ölkəmizdəki vəziyyətinin mövcud durumdakından da kəskin olacağını düşünmürəm. Niyə olsun ki?! Çünki biz artıq COVİD-in kəskin dövrünü yaşadıq, biz artıq vaksinasiya dövrünü yaşayırıq. Bu günlərdə cənab Prezident də qeyd etmişdi ki, yeni ildən sonra artıq respublikamıza peyvəndlər gətiriləcək və peyvəndləmə işləri başlayacaq. Ümidvaram ki, yaxın bir ay müddətində peyvəndləmə işlərinə başlanacaq və vaksinasiya işlərindən sonra da xəstələrin sayı, güman ki, azalacaq.
Yaya doğru getdikcə bu virusa yoluxma sayı nisbətən azalacaq. Artıq insanlarımızın çoxu da bu virusa yoluxub, onlarda buna qarşı immunitet yaranıb. Yəni, həm xəstəliyi keçirənlər var, həm insanlar vaksinasiya olunacaq. Bu da respublikamızın əhalisinin çoxluğunu təşkil edəcək. Bu xəstəliyə yenə az-az da olsa ölkəmizdə gələcəkdə rast gəlinə bilər. Amma bu, ölüm faizi yüksək olan bir proses olmayacaq. Qrip kimi müəyyən bir dövrdə bizlə "yoldaşlıq" edəcək, sonra keçib gedəcək".