Otur-dur vicdanla!

Daxili işlər naziri Ramil Usubov, baş prokuror Zakir Qaralov və millət vəkili Əli Hüseynov cənablarına ithaf)
Əgər yerindəsə idrakla göz-qaş,
Nahaq qan tökməyə lazımdırmı baş?
Haqqa tələ quran deyilmi daş-qaş?
Otur-dur qananla, ay Ramil qardaş!

Deyirəm: uzaq ol oddan-alovdan,
Çalış ki, söyləmə heç kəsə yalan!
Gözləmə xəyanət düz danışandan!
Otur-dur insanla, ay Zakir qardaş!

Birin bilməyənlər min birin bilməz,
Şoran torpaqlarda gül-çiçək bitməz,
Ariflər boş yerə danışmaz, gülməz,
Otur-dur sərrafla, ay Ramil qardaş!

Olarsa qohumun qarğa-sağsağan,
Dələduz, saxtakar, yaltaq adamdan,
Nə haqq, nə ədalət gözləmə ondan,
Otur-dur sən haqla, ay Zakir qardaş!

Nahaqdan iş açma sən vətəndaşa,
Olma baş ağrısı yada, qardaşa,
Gəl haqqa hörmət et, Babək tək yaşa!
Otur-dur vicdanla, ay Ramil qardaş!

Deyirəm, dünyamız ağır xəstədir,
Oğrular, quldurlar dəstə-dəstədir,
Çapıb-parçalamaq niyyətindədir?
Otur-dur vicdanla, ay Zakir qardaş!

Seçib vəkil səni zavallı millət,
Haqqa, ədalətə etmə xəyanət.
Nankor insanlarda olmaz ləyaqət,
Nə xoş münasibət, nə də mərhəmət.
Otur-dur vicdanla , ay Əli qardaş!

DİN Kadrlar İdarəsi, 05.12.2005. № 21/41-7382-H-378 Milis leytenantı Güloğlan Hüseynov
Qeyd: Təəssüflər olsun ki, həyatda saxtakar, yaltaq qohum-qardaşa tez-tez rast gəlirik!