Partlayışda yaralanan qadın xəstəxanada öldü (VİDEO-FOTO)

Qaz sızması, yoxsa ildırım vurması? Ailənin 4 üzvündən biri dünyasını dəyişib. Göyçay rayonunda fərdi yaşayış evində baş verən partlayış və yanğın zamanı ağır yanıq xəsarətləri alan bir ailənin 4 üzvündən biri dünyasını dəyişib.

Həkimlərin səyinə baxmayaraq 34 yaşlı Kəmalə Həşimova aldığı ağır xəsarətlər səbəbindən xəstəxanada ölüb. Ailənin digər üzvlərinin həyatı xilas edilib. Lakin, onların vəziyyəti ağır olduğu üçün tibbi yardım göstərildikdən sonra müalicə üçün Bakı şəhərinə, Respublika Yanıq Mərkəzinə yola salınıblar.
Qeyd edək ki, ötən gün rayonun Malı-Şıxlı kənd sakini 34 yaşlı Atəş Həşimova məxsus evdə baş verən partlayış zamanı ev sahibi və həyat yoldaşı, iki azyaşlı övladları yanıq xəsarətləri almışdılar. Evdə qaz sızması nəticəsində partlayış və yanğının olduğu deyilsə də, qonşuların sözlərinə görə, ötən gecə səhərədək Mallı-şıxlı kəndində güclü şimşəklə müşayiət olunan leysan yağışının yağması zamanı qəflətən həmin mənzili ildırım vurub və nəticədə güclü partlayış və yanğın baş verib. Hazırda hər iki versiya üzrə araşdırmalar davam etdirilir. (Region TV)