Putinin hərbi blokundan Qarabağ bəyanatı

"Dağlıq Qarabağ münaqişəsi regionun təhlükəsizliyi üçün zərbədir".

Kollektiv Təhlükəsizlik Müqaviləsi Təşkilatı (KTMT) Dağlıq Qarabağ münaqişəsi ilə bağlı bəyanat qəbul edib. ANS PRESS-in məlumatına görə, bu barədə Ermənistanın xarici işlər naziri Edvard Nalbandyan İrəvanda keçirdiyi brifinqdə deyib.

İclasda həmçinin Suriya münaqişəsi ilə bağlı da bəyanat qəbul edilib.

"Dağlıq Qarabağ münaqişə zonasında gərginliyin azaldılması, vəziyyətin stabilləşdirilməsi və sülh prosesinin irəliləməsini nəzərdə tutan şəraitin yaradılmasına dair 16 may Vyana və 20 iyun Sankt-Peterburq sammitlərində əldə edilmiş razılaşmalara dəstəyimizi ifadə edirik. Dağlıq Qarabağ probleminin istisnasız olaraq sülh yolu ilə həlli zərurətini təsdiqləyərək biz ATƏT-in Minsk qrupu ölkələrinin münaqişənin beynəlxalq hüquq normaları, BMT Nizamnaməsi, Helsinki Yekun Aktında əksini tapan güc tətbiq etməmək və güclə hədələməmək, ərazi bütövlüyü, xalqların öz müqəddəratını həll etmək prinsipləri əsasında həlli cəhdlərini alqışlayırıq", - deyə bəyanatda bildirilir.

Təşkilat yeni iclasın oktyabr ayında İrəvanda keçirilməsi ilə bağlı qərar qəbul edib.

İclasda Rusiyanın xarici işlər naziri Sergey Lavrov və təşkilatın baş katibi Nikolay Bordyuja da iştirak edib.

Nikolay Bordyuja iclasda çıxışı zamanı deyib ki, Dağlıq Qarabağ münaqişəsi regionun təhlükəsizliyi üçün zərbədir. “Biz bu məsələni müzakirə edib bəyanat qəbul etmişik”.

Rusiyanın təşəbbüsü ilə yaradılan təşkilatın ildə bir neçə dəfə müxtəlif formatlarda iclası keçirilir. Hərbi təşkilata Belarus, Rusiya, Ermənistan, Qırğızıstan, Qazaxıstan və Tacikistan daxildir.

Təşkilatın nizamnaməsinə görə üzv dövlətlərdən hər hansı birinə qarşı hərbi təcavüz faktı qeydə alınarsa, o zaman dövlətlər təcavüzkara qarşı birgə addım atmalıdır.

Ermənistan isə təşkilatın bu imkanlarından Dağlıq Qarabağ münaqişəsi üçün istifadə etmək istəyir. Amma aprel ayında baş verən hərbi əməlliyatlar zamanı təşkilata daxil olan dövlətlərin əksəriyyəti Ermənistanı dəstəkləməkdən açıq şəkildə imtina etdi.

Dövlətlərin bu addımı Ermənistan rəhbərliyinin kəskin etirazına səbəb olmuşdu.