Bu tarixdən etibarən karantin rejim yenidən sərtləşdirilə bilər - Əhaliyə vacib XƏBƏRDARLIQ

Son günlərdə bir neçə dünya ölkəsində, o cümlədən koronavirusun ən çox yayıldığı ölkələrdən biri olan İtaliyada karantin tədbirlərinin yumşaldılmasından dərhal sonra yoluxma hallarında artım qeydə alınıb.Oxşar vəziyyət Azərbaycanda da müşahidə olunur. Mayın 4-dən sonrakı günlərdə yoluxma hallarında yenidən artım müşahidə olunmağa başlayıb.Bu vəziyyət karantin tədbirlərinin pandemiyanın qarşısını almaq üçün nə qədər effektiv vasitə olduğunu göstərməklə yanaşı, yoluxma hallarının artması karantin rejiminin yenidən sərtləşməsi ehtimalını yüksəldir. Artıq Operativ Qərargah da bu barədə açıqlama verib. ÜST isə bir sıra ölkələrdə xəstəliyin yayılmasında yüksəlmə müşahidə olunacağını bildirir.Bəs bizim yerli mütəxəssislər və əlaqədar qurumlarda bu mövzuda düşüncə necədir? Azərbaycanda yoluxma hallarının artması karantin tədbirlərinin sərtləşməsinə səbəb ola bilərmi? Bunun üçün meyar nə ola bilər?
Bununla Sonxeber.az-a danışan deputat Nəsib Məhəməliyev bildirib ki, etiraf etməliyəm ki, son günlərin statistikası məyus edicidir:
"Vətəndaşlarımız hər gün koronavirusa yoluxanların sayının azalması və karantin rejiminin yüngülləşdirilməsi ilə bağlı xoş xəbərləri gözlədiyi halda, əks məlumatlar alması üzücüdür. Bunun əsas səbəbi aprel ayının 27-də karantin rejimi qismən yumşaldıldıqdan sonra, bir çox insanlarda arxayınlıq yaranması və kütləvi şəkildə küçələrə axışmasıdır. İctimai nəqliyatda, ticarət obyektlərində, bankların qarşısında, dayanacaqlarda, sosial məsafə saxlamadan müəyyən olunmuş qaydalara riayət etmirlər. Nəticə göz qabağındadır. Bir gündə 76 nəfərin virusa yoluxması pis haldır. Əgər, belə davam edərsə, mayın 11- də karantin rejimi nəinki yumşaldılar, əksinə daha da sərtləşdirilməsini proqnozlaşdıra bilərik. Aydındır ki, insanlar normal həyat rejiminə qayıtmaq istəyir. Bunu ilk növbədə hökumət də arzulayır. Ancaq bu ilk növbədə vətəndaşlarımızdan karantin rejiminin qaydalarına ciddi riyaət etmək, məsuliyyətli olmaq tələb olunur. Səbrli olaraq, milli birlik nümayiş etdirməklə koronovirusa qalib gəlməli, lüzumsuz risk edərək özümüzü və yaxınlarımızın həyatını təhlükəyə qoymamalıyıq".