Cəngəmiranlı gənc cəng adamı

“Relax Lerik” idman klubunun üzvü, 3-cü dan qara kəmər sahibi, müxtəlif beynəlxalq peşəkar turnirlərin qalibi Nurlan İlham oğlu Canəlizadə 24.09.1996-cı il tarixdə Lerik rayonunun Cəngəmiran kəndində anadan olub. 2002-ci ildə Rəşid Nurullayev adına Cəngəmiran kənd orta məktəbinin 1-ci sinfinə gedib, 2013-cü ildə həmin məktəbdən məzun olub. 2015-2017-ci illərdə Azərbaycan Respublikasının Silahlı qüvvələrində Vətənə hərbi xidməti borcunu yerinə yetirdikdən sonra 2018-ci ildə Azərbaycan Respublikası Fövqəladə Hallar Nazirliyinin LRDYMH-nin əməkdaşı olaraq xidmətinə davam etmişdir.
On iki yaşından başlayaraq sərbəst güləşlə yeddi il məşğul olduqdan sonra çoxsaylı idman növlərinin də sirlərinə bələd olmuşdur. Hal-hazırda full-kontakt qraplinq idman növləri üzrə məşqçi – müəllim lisenziyasını Azərbaycan Budo Döyüş Növləri Federasiyasından almışdır.
2017-ci ildə Dünya Kuboku uğrunda döyüşdə iranlı rəqibini məğlub edib ikiqat Dünya Kubokunun qalibi adına layiq görülüb. Müxtəlif federasiya və təşkilatların keçirdikləri böyük beynəlxalq turnirlərdə ölkəmizi təmsil edib uğurlar qazanıb.
20-21 dekabr 2021-ci il tarixlərdə “Sərhədçi” Olimpiya idman kompleksində Azərbaycan Respublikasının Gənclər və idman Nazirliyi və Azərbaycan Okinava Qoçy-RYU karate-do və kempo kobudo idman növləri Federasiyasının birgə təşkilatçılığı ilə Ali Baş Komandan İlham Əliyevin 60 illik yubileyinə və Zəfər gününə həsr edilmiş karate-do idman növü üzrə uşaq, yeniyetmə, gənclər və böyüklər arasında 25-ci açıq Azərbaycan çempionatı və birinciliyində "Kempo" idman növünün Full Kempo versiyası üzrə qalib gələrək I (birinci) yeri tutmuşdur.
Hələlik son döyüşü bu il may ayının 27-də Azərbaycan Budo Döyüş Növləri Federasiyasının prezidenti Faiq Rəfiyev tərəfindən təşkil olunan Beynəlxalq peşəkar turnirdə baş tutub. Nurlan gürcü rəqibinə məğlubiyyət yaşadaraq turnirin qalibi olub. Bu münasibətlə millət vəkili İqbal Məmmədov şəxsən onunla görüşərək təbrik edib, gələcək idman həyatında uğurlar arzulayıb.
Nurlan Canəlizadə hal-hazırda Lerik rayon şəhid Qədir Nəzərov adına “Cəngi” idman klubunun direktoru və məşqçi-müəllim kimi fəaliyyət göstərir, həm də növbəti döyüşlərə hazırlaşır.
Ətraflı videoda:
https://www.youtube.com/watch?v=qzKeWeakH68