İŞDƏN ÇIXARILAN 5 NƏFƏRLƏ BAĞLI NAZİRLİKDƏN AÇIQLAMA

Xəbər verdiyimiz kimi, müğənni Afət Fərmanqızının ifa etdiyi mahnıya məzəli videoçarx hazırlayan Şəki Mərkəzi Xəstəxanasının 5 əməkdaşı işdən qovulub. İşdən çıxarılan tibb bacısı İlahə İsrafilova iddia edib ki, xəstəxananın baş həkimi Elçin Əmirov belə bir addım atdıqları üçün onları cəzalandıraraq məcburi ərizə yazdırıb.
Korupsiya-q.az xəbər verir ki, Səhiyyə Nazirliyinin mətbuat xidmətinin rəhbəri Pərviz Abubəkirov məsələylə bağlı açıqlamasında bidirib ki, işdən çıxarılan şəxslərə ərizə məcburi şəkildə yazdırılıbsa, məhkəməyə müraciət edə bilərlər:
“Biz hüquqi dövlətdə yaşayırıq. Videoda qabaqda oxuyan xanım öz ərizəsi ilə işdən ayrılıb. Əgər hesab edirsə ki, o ərizəni ondan məcburi alıblar məhkəməyə getsin. Hər hansı bir müəssisənin işçisi ilə müdir arasındakı problem həmişə məhkəmədə həll olunub, televiziyada yox. Əgər məqsədi həqiqətən işə qayıtmaqdırsa, həmin xanım məhkəməyə müraciət etməlidir. Bildirməlidir ki, hüquqları tapdalanır. Məhkəmə qərarı ilə də işə bərpa olunmalıdır. Ancaq məşhurlaşmaq istəyirsə, videonu belə internetdə, televiziyada yaya bilər.
Bu məsələnin nazirliyə heç bir aidiyyatı yoxdur. Çünki Şəki Şəhər Mərkəzi Xəstəxanasının baş həkimi və 1400 işçisi var. O işçilərlə rəhbərin münasibətində münaqişə yaranırsa, problem hüquq müstəvisində həll olunmalıdır. Etik davranış normaları var. İşçi iş vaxtı elə edirsə, müəyyən tənbehlər nəzərdə tutulur”.
Məsələ ilə bağlı Şəki Mərkəzi Xəstəxanasının baş həkimi ilə əlaqə saxlamağa çalışsaq da, zənglərimizə cavab verən olmayıb.
Qeyd edək ki, işdən çıxarılanların arasında 40 ildir sözügedən xəstəxanada işləyən tibb bacısı Mirvari Salmanova da var. Digərləri isə tibb bacısı İlahə İsrafilova, xadimələr Ruhəngiz Səmədova, Arzu Zaharova və adının çəkilməsini istəməyən bufetçidir.

image_printÇap Et