“Uşağın doğulmasına görə birdəfəlik müavinət təyinatı elektronlaşdırılıb”

"Əmək və Əhalinin Sosial Müdafiəsi Nazirliyi tərəfindən 2019-cu ilin əvvəlindən pensiya təyinatı avtomatlaşdırılıb. Nəticədə ölkəmizdə ilk proaktiv xidmət olaraq, pensiya hüququ yaranmış şəxs özü müraciət etmədən və sənəd təqdim edilmədən ona elektron qaydada pensiya təyin edilir. Bununla yanaşı, ilin sonuna kimi 10-a qədər müavinət və təqaüd üzrə təyinatın avtomatlaşdırılması nəzərdə tutulub. Onlardan biri də uşağın doğulmasına görə birdəfəlik müavinətin təyinatı artıq elektronlaşdırılıb".
Azadinform xəbər verir ki, bunu Əmək və Əhalinin Sosial Müdafiəsi nazirinin müavini Anar Kərimov bu gün keçiriləm mətbuat konfransında deyib.
Qurum rəsmisi qeyd edib ki, uşağın doğulmasına görə birdəfəlik müavinət valideynlər işlədikləri halda onların iş yeri vasitəsilə ödənilir: "Hər iki valideyn işləmirsə, bu ödənişin alınması üçün müvafiq sənədlərlə nazirlik yanında Dövlət Sosial Müdafiə Fondunun rayon şöbəsinə müraciət olunur. Həmin sənədlərin toplanması, təqdim edilməsi müəyyən çətinliklər, həm də vaxt itkisi yaradırdı. Ona görə də uşağın doğulmasına görə birdəfəlik müavinətin elektron qaydada təyinatı xidməti ilkin mərhələdə məhz hər iki valideyn işləmədiyi halda həmin valideynləri əhatə edəcək. Növbəti mərhələdə isə müvafiq hazırlıq işlərindən sonra bu e-xidmət işləyən valideynləri də əhatə edəcək".