Qobustan rayon rəhbərliyindən Dövlət Bayrağına hörmətsizlik

Ölkəmizdə dövlət rəmzlərimizə hörmət və məhəbbət Ulu Öndərin xalqımıza ən böyük əmanətlərindən biridir. Müstəqilliyimizin hər bir atributunun Azərbaycan vətəndaşının qürur mənbəyinə çevrilməsi Prezident İlham Əliyevin Bakıda möhtəşəm Bayraq Meydanının yaradılması barədə qərarından qaynaqlanır. İndi ölkənin hər bir bölgəsinin ən uca, ən baxımlı yerində üçrəngli, ay-ulduzlu bayrağımız dalğalanır. Qobustan rayonunun mərkəzində yaradılmış Bayraq Meydanı da sakinlərin ən çox üz tutduqları məkanlardan biri kimi təqdim olunurdu. İki hektar ərazini əhatə edən meydanda ucaldılmış bayraq dirəyinin hündürlüyü 50 metrdir. Bayrağın eni 10, uzunluğu 20 metr olub. Altı ay müddətində inşa olunmuş Bayraq Meydanında geniş abadlıq işləri aparılmışdı. Azərbaycan Respublikasının Prezidenti İlham Əliyev 2013-cü il mayın 1-də Qobustana səfəri çərçivəsində rayon mərkəzindəki parkda Bayraq Meydanında yaradılmış şəraitlə tanış olmuş, tapşırıq və tövsiyələrini vermişdi.
Fikir verdinizsə, bayraqdan yazanda redaksiya olaraq “olunurdu”, “olub” kimi keçmiş zamanı ifadə edən sözlərdən istifadə edirik. Çünki sözügedən dövlət bayrağının dirəyi var, özü yoxdur. Rayon İcra Hakimiyyəti öz inzibati binasının düz qarşısındakı bu böyük naqisliyi aradan qaldırmaq istəmir. Qobustanda ezamiyyətdə olarkən əməkdaşımız yerində çəkilişlər apararaq bir çox başqa utancverici qanunsuzluqlar da aşkarlayıb. Belə ki, RİH-nin binasının yaxınlığındakı yolun altındakı keçid, onun giriş və çıxış hissələri bərbad vəziyyətdədir, üzlük daşlar uçub tökülüb. Keçidin sol çıxış tərəfindəki ağaclıq hissədə şıdırğı inşaat işləri gedir. Ərazi hasara alınıb, təyinatı, kimə məxsusluğu, icazəsinin olub-olmadığı heç usta və fəhlələrə də bəlli olmayan tikinti işlərinin qoyulmuş bünövrələrinin bəzən hətta döngə nöqtələri ağaclarla üst-üstə düşüb. Çox güman ki, hasarlarla əhatələnmiş ərazidəki ağacları məhv edəcəklər. Adının çəkilməsini istəməyən Qobustan şəhər sakini isə dedi ki, bu ərazini RİH başçısı Adil Məmmədov satıb.
Mövzuya qayıdacağıq.
Elsevən Gözəldərəli