Qəzetimizin ötən sayında Füzuli rayonunun Kürdmahmudlu kəınd sakini Hüseynova Günəş Həbib qızının, Bakı şəhəri Ə.Hüseynzadə küçəsi - 85 ünvanda yaşayan Cahangirova Fəridə Abdul qızı və Ucar rayonunun Şahlıq kənd sakini Murad Amalya Çingiz qızının ərizəsi əsasında hazırlanmış "Vətəndaşları aldadıb pullarını mənimsəyən qadın niyə axtarılmır?" sərlövhəli məqalə dərc olunmuşdu. Söhbət onların özünü "Sevda Əliyeva" kimi tanıtmış bir qadın tərəfindən aldadılmalarından, həmin qadının onların hərəsindən müxtəlif bəhanələrlə (özlərini və ya yaxın adamlarını işə düzəldəcəyi vədi verərək və s.) müxtəlif məbləğlərdə pul və qiymətli əşyaları alaraq qaytarmamasından gedirdi. Sevdanın istifadə etdiyi telefon nömrəsini bilmələrinə, onunla əlbir olduğuna dair ciddi şübhələr ortaya çıxmış taksi şoferini tanıdıqlarına baxmayaraq, polis həmin qadının gerçək kimliyini müəyyən etməyə tələsmir.
Həmin məqalədən bəzi sitatların altını cızırıq: "G.Hüseynova və digər onun kimi aldadılmış şəxslər istəyirlər ki, Sevda kimi tanıdıqları qadın tapılsın, onların pullarını geri qaytarsın, dələduzluq əməllərinə görə məsuliyyətə cəlb olunsun, başçılıq etdiyi dəstənin üzvləri də iştirak dərəcələrinə görə cəzalarını alsınlar. Amma əlbəttə, buna qədər Sevdanın əsl kimliyi müəyyənləşdirilməlidir ki, bu da hüquq-mühafizə orqanlarının işidir. Bunu etmək isə indiki tanıma texnologiyaları ilə çətin deyildir - ortada Sevdanın üz cizgilərinin dəqiq əks olunduğu fotoşəkil, rabitə kanallarının saxlancında zəng qeydləri, səs yazıları vardır. Bakı şəhər Baş Polis İdarəsi Nəsimi rayon Polis İdarəsinin 21-ci Polis Bölməsindən isə Günəş Hüseynovaya məktubla yazıb tövsi ə ediblər ki, ərizəsi mülki xarakter daşıdığı üçün məhkəmə orqanlarına müraciət etsin. Maraqlıdır, bəyəm məhkəmə kimliyi müəyyən olunmayan adam haqqında şikayəti qəbul edərmi?"
Məhz bu sualla yekunlaşan məqalənin dərc olunduğu qəzet nüsxəsini müşayiətedici məktubla 05.10.2018-ci il tarixdə Bakı şəhər Baş Polis İdarəsinə göndərmişdik. Qəribədir ki, Bakı şəhər Baş Polis İdarəsinin 07.11.2018-ci il tarixli cavab məktubunda da sonuc olaraq məsələ mülki xarakterli mübahisə kimi tövsif olunaraq məhkəməyə müraciət edilməsi tövsiyə edilmişdir. Belə çıxır ki, cavab məktubunun müəllifi, BŞBPİ -nin İctimai Təhlükəsizlik idarəsinin rəisi Nurullah Məmmədxanlı sanki həmin sualı görməmişdir.
VƏTƏNDAŞLARI ALDADIB PULLARINI MƏMSƏYƏN QADIN NİYƏ AXTARILMIR?
