Tacikistan hökuməti saqqal və hicab qadağası ilə bağlı iddialara aydınlıq gətirdi

Tacikistan hökuməti ölkə ərazisində uzun saqqal saxlamağa və hicab geyinməyə qanunvericilik səviyyəsində heç bir qadağa tətbiq etməyib.

Bu barədə rəsmi məlumatlara istinadən "Asiya-plyus" portalı xəbər yayıb.

Rəsmi açıqlamaya səbəb bəzi kütləvi informasiya vasitələrində ölkədə kişilərin uzun saqqal saxlamasının, qadınların isə hicab tipli dini geyimlər geyinməsinin artıq yolverilməz olduğu barədə iddiaların yayılması olub.

"Tacikistan vətəndaşlarının dini hüquq və azadlıqlarının təmin olunması vəziyyəti bəzi KİV və müxtəlif təşkilatların təqdim etdiyi kimi deyil. Ölkədə vicdan və din azadlığının həyata keçirilməsi üçün zəruri olan qanunvericilik bazası, eləcə də digər şərtlər mövcuddur", - deyə məlumatda bildirilib.

O cümlədən əlavə edilib ki, Tacikistanda dini azadlıqların vəziyyəti ilə bağlı verilən qiymətləndirmələr çox vaxt real vəziyyəti əks etdirmir.

Vurğulanır ki, bu cür iddialar əsasən şübhəli mənbələrdən alınan məlumatlara əsaslanır.