Ərdoğan qələbəsi üçün şükür namazı qıldı

Türkiyə prezidenti Rəcəb Tayyib Ərdoğan Ədalət və İnkişaf Partiyası (AKP) parlament seçkilərində qələbə qazandığı üçün bu gün səhər Eyub Sultan məscidində şükür namazı qılıb.
"Korrupsiya və Qanun" qəzeti Türkiyə mediasına istinadən xəbər verir ki, yerli vaxtla saat 6.50 radələrində məscidə gələn prezident əvvəlcə camaatla namaz qlıb, sonra Sultan Əyyub türbəsini ziyarət edib. Daha sonra Ərdoğan Quran oxuyub.
Məscidin çıxışında jurnalistlərin suallarını cavablandıran prezident milli iradənin sabitliyə səs verdiyini deyib.
“Üzərimizdə oynanılan oyunlara cavab verməyimiz lazımdır”, -Türkiyə prezidenti söyləyib.
Xatırladaq ki, noyabrın 1-də Türkiyə Böyük Millət Məclisinə keçirilən seçkilərdə Rəcəb Tayyib Ərdoğanın qurucusu və lideri olduğu Ədalət və İnkişaf Partiyası təxminən 49,5 faiz səs alaraq təkbaşına hökumət qurmaq səlahiyyəti qazanıb.