Daha bir küçənin sakinləri zibillikdən şikayət edir - FOTO

Bakının Binəqədi rayonu, Ramazanov küçəsi, döngə 2 ünvanında məişət tullantıları üçün nəzərdə tutulmuş yerdə zibil yeşiklərinin olmaması nəticəsində yaranmış antisanitariya qeyd olunan ünvanda yaşayan sakinlər üçün bir ekoloji fəlakətə çevrilib.
Bu barədə Oxu.Az-ın redaksiyasına şikayət daxil olub.
Bildirilib ki, onlar məsələ ilə bağlı Ekologiya və Təbii Sərvətlər nazirliyinə müraciət ediblər:
“Yalnız 2019-cu il fevral ayında nazirliyə müraciət olunduqdan sonra icra hakimiyyəti və bələdiyyədən nümayəndələr gəlib baxıb, ancaq heç bir tədbir görülməyib”.
Qeyd edilib ki, artıq vəziyyət dözülməz həddə çatıb:
“Pandemiya dövründə biz bilmirik, virusla mübarizə aparaq, yoxsa məişət tullantıları ilə”.