Aqil Abbas: “Hər kəs evinin üstündən bayraq asa bilməz”

“Hər kəs evinin üstündən bayraq asa bilməz”.
Korrupsiya-q.az Turkustan.info -ya istinadla xəbər verir ki, bunu modern.az-a açıqlamasında V çağırış Milli Məclisin deputatı Aqil Abbas bildirib. O bayrağın asılması üçün konkret müəyyən edilmiş yerlərin olduğunu vurğulayıb:
“Bayrağın asılma yerləri var: dövlət müəssiələri, dövlət qurumları və s. Amma bayram günləri hamı evinin pəncərəsindən bayraq asa bilər. Bu qayda bütün dünyada belədir. Bayrağın asılma günləri ilə bağlı qanunda müddəalar var, orada da qeyd olunub ki, bayraq nə vaxt asıla, nə vaxt endirilə bilər”.
Qeyd edək ki, bir müddət əvvəl A.Abbas bayrağın şaquli asılma qaydasının da yalnış olduğunu bildirib. Deputat bayrağın şaquli vəziyyətdə solda mavi rəng olmaqla asılmalı olduğunu deyib, hazırki asılma qaydasının səhv olduğunu diqqətə çatdırmışdı.

Bayrağın asılma qaydasında hər hansı dəyişikliyin olması il bağlı sualımızı Ədliyyə Nazirliyi Qanunvericilik baş idarəsinin rəisi Adil Əliyev belə cavablandırıb:

“Bildiririk ki, Azərbaycan Respublikası Nazirlər Kabinetinin 2005-ci il 25 mart tarixli 55 nömrəli Qərarı ilə təsdiq edilmiş “Azərbaycan Respublikası Dövlət bayrağının qaldırılması (asılması), endirilməsi, saxlanılması və istehsalı Qaydaları”nın 12-1-ci hissəsinə edilmiş 2018-ci il 21 iyun tarixli dəyişikliyə əsasən, Azərbaycan Respublikasının Dövlət bayrağı binanın divarına dirəksiz şaquli çəkildikdə və ya şaquli vəziyyətdə xüsusi tutqaclara bərkidildikdə, Dövlət bayrağının yaşıl zolağı qarşıdan baxılarkən sol tərəfə yerləşməlidir.
“Normativ hüquqi aktlar haqqında” Azərbaycan Respublikasının Konstitusiya Qanununun 37-ci maddəsinə görə qanunlarla və ya fərmanlarla digər hal nəzərdə tutulmadıqda, normativ hüquqi aktda onun qəbul edilməsindən sonra 6 aydan tez müddətdə dəyişikliklər edilməsinə daha yüksək hüquqi qüvvəyə malik olan normativ hüquqi aktın tələbləri və ya normativ hüquqi aktın hüquqi, linqvistik, iqtisadi, ekoloji, kriminoloji və ya maliyyə ekspertizasının rəyi əsasında yol verilir.Yuxarıda qeyd edilənlərə əsasən, “Azərbaycan Respublikası Dövlət bayrağının qaldırılması (asılması), endirilməsi, saxlanılması və istehsalı Qaydaları”na sözügedən məsələ ilə bağlı dəyişikliyin edilməsi istisna edilmir”.