Ağaclar aşdı, elektrik xətləri qırıldı, evləri su basdı - GƏNCƏDƏ LEYSAN

Ötən axşamdan etibarən Gəncəyə yağan güclü leysan yağışı bir sıra fəsadlar törədib.

APA TV-nın qərb bürosunun verdiyi məlumata görə, leysan yağış nəticəsində şəhərin bəzi ərazilərində elektrik enerjisinin verilişində uzunmüddətli fasilələr yaranıb.

Leysan şəhərin küçə və prospektlərində avtomobillərin hərəkətini də çətinləşdirib. Eyni zamanda şəhərin müxtəlif ərazilərində həyət evlərinə su dolub. Şəhərdə yerləşən Xan bağında isə iri ağac küləyin təsirindən aşaraq ərazidəki iaşə obyektinin üzərinə düşüb. Hadisə nəticəsində xəsarət alan olmayıb. Ancaq obyektin şüşələrinə ziyan dəyib.

Heydər Əliyev prospektində də bir ağac qırılaraq hərəkətə maneə yaradıb. Evlərə dolan suyu isə sakinlər gecə boyu daxili imkanları hesabına boşaltmağa çalışıb. Xeyli sayda ev əşyası yağış sularından yararsız hala düşüb. Ev quşları boğularaq tələf olub.

Gəncə şəhər İcra Hakimiyyəti başçısının şəhər təsərrüfatı üzrə müavini Mikayıl Zeynalov bildirib ki, şəhərdə elektrik enerjisinin verilişi bərpa edilib, qırılan ağaclar ərazidən təmizlənib, zirzəmi və həyətlərə dolan suyun təmizlənməsi istiqamətində işlər aparılır.