Gəncədə oğru dəstəsi zərərsizləşdirildi

Gəncə şəhər Baş Polis İdarəsi və Kəpəz rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində Gəncə şəhərində və ətraf rayonlarda fərdi yaşayış evlərində çoxlu sayda oğurluq hadisəsi törətmiş 6 nəfərdən ibarət mütəşəkkil dəstə müəyyən edilərək zərərsizləşdirilib. Criminal.az-ın APA-ya istinadən verdiyi xəbərə görə, bunlar Gəncə şəhər sakinləri Şahmar Süleymanov, Xaləddin İsmayılov, Asim Məmmədov, Hünər Rüstəmov, Bəxtiyar Hacızadə və Elvin Abbasovdur.

Onların ətrafında keçirilən əməliyyat tədbirləri zamanı oğurlanmış maddi sübutlar - 5 ədəd iri ölçülü plazma televizor, kombi istilik cihazları və xeyli sayda digər məişət əşyaları götürülüb. Həmin şəxslərin digər cinayətlərdə iştirakı yoxlanılır. Faktla bağlı cinayət işi açılıb, istintaq gedir.