Bir həftəyə toyu olacaqdı, yas çadırı quruldu

Bu gün günorta saatlarında Oğuz rayonunun Filfilli kəndi yaxınlığında Böyük Qafqaz sıra dağlarının qayalıq ərazisindən aşağı yıxılan gəncin meyiti tapılıb.

"Report”un Şimal-Qərb bürosunun məlumatına görə, 1988-ci il təvəllüdlü kənd sakini Sərxan Sərdar oğlu Seyidəliyev, hələlik bilinməyən səbəblərdən 500 metr yüksəklikdən aşağı düşüb.
Hadisə yerinə cəlb olunan Oğuz rayon hüquq-mühafizə orqanlarının əməkdaşları və Fövqəladə Hallar Nazirliyinin xilasediciləri gəncin meyitini taparaq aidiyyəti üzrə təhvil veriblər.
Criminal.az xəbər verir ki, iki gün əvvəl dostu ilə dağlıq əraziyə ov etmək üçün getdiyi güman edilən 28 yaşlı Sərxan Seyidəliyev yüksək qayalıqdan yıxılaraq aldığı ağır bədən xəsarətlərindən hadisə yerində ölüb. Faktla bağlı Oğuz rayon prokurorluğunda araşdırma aparılır.

Məlumata görə, Sərxan Seyidəliyevin avqustun 20-də toyu olacaqmış.