Canavarlar kəndə daraşdı - 24 qoyun parçalandı

Saatlı rayonunda şəxsi təsərrüfata canavarlar hücum edib.

"Korrupsiya və Qanun" APA-ya istinadən bildirir ki, hadisə Saatlı rayonunun Əbilkənd kəndi ərazisində - Orucov Mehman Bəxtiyar oğlunun təsərrüfatında qeydə alınıb. Gecə saatlarında bir neçə canavar tövlədə olan qoyun-quzuya hücum edərək 24 qoyunu parçalayıb, 6-sını aparıb və 5-ni yaralayıb. Təsərrüfat sahibinə 5 min manatdan çox ziyan dəyib. Ev sahibi canavar ovu qadağan olunduğuna görə onları öldürməyə ehtiyat edib.

Saatlı rayon Baytarlıq Xidməti hadisə yerindən nümunə götürüb və ərazidə dezinfeksiya işləri aparılıb. Ölmüş qoyunlar Baytarlıq Xidməti tərəfindən basdırılıb.