Ermənilərdən acı etiraf: 6 aya 136 hərbçi ölüb

2016-cı ilin son 6 ayı ərzində Ermənistan Silahlı Qüvvələrinin 136 hərbçisi ölüb.

Azvision.az erməni KİV-nə istinadən xəbər verir ki, bunu Helsinki Vətəndaş Assambleyasının Vanadzor ofisi məlumat yayıb.

Araşdırmaya əsasən 136 ölüm hadisəsindən 77-i 1-5 aprel tarixlərində qeydə alınıb. Digər ölüm halları isə rəsmi məlumatlara əsasən başqa səbəblərdən (özünə qəsd, nizamnamənin pozulması, təbii fəlakət və s.) baş verib.

Məlumata əsasən erməni əsgərləri arasında qeydə alınan ölüm hallarından 17-i Ermənistan, 119-u isə Dağlıq Qarabağ ərazisində baş verib.

Ötən ilin analoji dövrü ilə müqayisədə Ermənistan ordusunda ölüm halları 4 dəfə artıb. Belə ki, 2015-ci ildə bu göstərici 34 ölüm faktı olub.

Sənəddə, həmçinin son üçü ilin statistik məlumatları da öz əksini tapıb: “2013-2016-ci illərdə Ermənistan ordusunda 288 ölüm faktı qeydə alınıb ki, onlardan 114-dü qeyri döyüş şəraitində, 174-ü isə atəşkəs rejiminin pozulması nəticəsində baş verib”.