Azərbaycan sərhədi yaxınlığında terrorçular öldürüldü

Dağıstanda bir qrup terrorçu məhv edilib.

Bu barədə Şimali Qafqaz regionu üzrə Respublika idarəetmə nümayəndəsi Rəsul Temirbəyov deyib.

"Xüsusi təyinatlı dəstənin saxlanılan şəxslərinin ifadəsi əsasında Qarabudaqkənddə meşəlik ərazidə keçirdiyi əməliyyat zamanı "Mahaçqala" adlı quldur dəstənin 9 üzvü, o cümlədən dəstə rəhbəri Hüseyn Tahirov öldürülüb", - deyə Rəsul Temirbəyov bildirib.

Dağıstanın hüquq-mühafizə orqanlarının məlumatına görə, Qarabudaqkənd rayonunda daha iki yaraqlı külli miqdarda silah-sursatla saxlanılıb.

Yaraqlılarla döyüş zamanı bir polis əməkdaşı həlak olub, üç nəfər yaralanıb.

Ötən gün Dağıstanda antiterror əməliyyatı rejimi tətbiq edilib. Milli Antiterror Komitəsinin Qərargahından verilən məlumata görə, iyulun 7-nə keçən gecə qanunsuz silahlı birləşmələrin, onların havadarlarının və iştirakçılarının müəyyən edilib saxlanılması istiqamətində xüsusi tədbirlərin keçirilməsinə başlayıb:

"Keçirilən antiterror tədbirləri zamanı bəzi xüsusi əməliyyat-axtarış tədbirləri görüləcəyi üçün müvəqqəti məhdudiyyətlər əhali üçün olacaq. Hazırda əməliyyat-axtarış tədbirləri davam etdirilir".(anspress.com)