Beş qəpikdən 30 qəpiyə: Bakı metrosunda gediş haqları necə dəyişib?

“Bakı Metropoliteni” QSC-də gediş haqqının tarixçəsi barədə məlumat verilib.
“Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Bəxtiyar Məmmədov bununla bağlı məqalə hazırlayıb.
Qurum rəsmisi bildirib ki, 1967-ci il noyabrın 6-dan istismara başlanmış “Bakı Metropoliteni”ndə Azərbaycan müstəqillik qazanana qədər gediş haqqı 5 qəpik olub:
“1992-ci ilə yanvarın 4-də “Bakı Metropoliteni”ndə ilk dəfə gediş haqqının qiymət dəyişikliyi edilib və qərara əsasən, qiymətlər 15 qəpik olub. Yeni qiymət 1992-ci il martın 1-nə qədər qüvvədə qalıb. Həmin tarixdən bir sərnişinin daşınma haqqı 30 qəpik müəyyən edilib.
Gediş haqqını ödəmək üçün sərnişin keçid məntəqəsində avtomat-nəzarət aparatına iki ədəd 15 qəpiklik daxil edib. 1992-ci ilin iyun ayından gediş haqqı 1 rubl olub. Həmin vaxtdan jeton sistemi tətbiq edilməyə başlanılıb”.
Bəxtiyar Məmmədov bildirib ki, 1992-ci ilin dekabrın 17-də qiymətlər yenə dəyişib:
“Sərnişin metropolitendən istifadəyə görə 3 rubl ödəməli olub. 1993-cü ildə qiymətlər iki dəfə dəyişib. İyulun 26-dan metropolitendən istifadənin qiyməti 5 rubl müəyyən edilib.
Dekabrın 1-də isə gediş haqqı 30 rubl təyin edilməklə yanaşı, ödəmə vasitəsi kimi talon sistemi müəyyən edilib. 1994-cü il yanvarın 1-dən yenidən jeton sistemi tətbiq edilməklə sərnişinlər gediş haqqını milli pul vahidi – Azərbaycan manatı ilə ödəməyə başladılar. Bir jeton və ya bir gediş sərnişinə 3 manata başa gəlib.
1994-cü il fevralın 15-də yenidən talon sistemi tətbiq edilməklə gediş haqqı 5 manat olub. Həmin il iyulun 1-dən jeton sisteminə qayıdış olub. Metropolitendən istifadə isə 20 manat müəyyən edilib.
1994-cü il noyabrın 7-də sərnişin 50 manat ödəməklə metropolitendən istifadə etməyə başlanılıb. Həmin il dekabrın 15-dən gedişin qiyməti 100 manat olub. Qiymətlər 1995-ci il fevralın 5-də dəyişdi və 300 manat təyin edilsə də, cəmi 6 gün sonra 150 manata endirilib”.
QSC-nin rəsmisi qeyd edib ki, daha sonra qiymət dəyişikliyi 1996-cı il iyunun 27-də olub:
“250 manata gediş haqqı 10 ilə yaxın dəyişməz qalıb. 2006-cı il yanvarın 1-dən yeni milli pul siyasətinin nəticəsi kimi, qiymətlər də yenilənib. Yeni Azərbaycan manatı ilə gediş haqqı 5 qəpiyə bərabər olub. Həmin il martın 1-dən gediş haqqının yeganə ödəmə vasitəsi 2 manat dəyərində girov haqqı ödənişi olan plastik kartlara keçilib.
30 sentyabr 2009-cu ildə Tarif (Qiymət) Şurasının iclasında “Bakı Metropoliteni”ndə gediş haqqının qaldırılması barədə məsələ müzakirə olunub. Oktyabrın 1-dən gediş haqqının 15 qəpik olması barədə qərar qəbul edilib.
2011-ci il noyabrın 24-də Tarif (Qiymət) Şurasının iclasında metropolitendə gediş haqqının qaldırılması barədə məsələ müzakirə olunub. Həmin qərara əsasən, 2011-ci il dekabrın 1-dən gediş haqqı 20 qəpik həddində müəyyənləşdirilib. Tarif (qiymət) Şurasının 2018-ci ilin 30 iyul tarixində keçirilən iclasında cari il avqustun 1-dən 1 gediş üçün 30 qəpik müəyyən olunub”.












[xfgiven_embed] [/xfgiven_embed] [xfgiven_youtube][/xfgiven_youtube]