Bu sözlərin yazılışı DƏYİŞDİ – SİYAHI

Korrupsiya-q.az xəbər verir ki, Azərbaycan Milli Elmlər Akademiyasında Orfoqrafiya Komissiyasının Orfoqrafiya qaydalarına edilən dəyişikliklər açıqlanıb.
Dilçilik İnstitutunun mətbuat xidmətinin rəhbəri Təranə Şükürlünün verdiyi məlumata görə, Avropa dillərindən alınma sözlərdə söz əvvəlində qoşa s samitlərindən birinin düşməsi təklif qəbul edilib. Bundan sonra “ssenari”, “ssuda” kimi sözlər, “senari”, “suda” kimi, Avropa dillərindən alınma sözlərdə söz sonunda qoşa s samitlərindən biri düşəcək. “boss”, “brass”, “ekspress”, “stress”, “trass” kimi sözlər “bos”, “bras”, “ekspres”, “stres”, “tras”və s. Kimi yazılacaq.
“Anti… ön şəkilçisi və trans, proto morfemlərinin xüsusi isimlərlə birləşməsi qaydası da dəyişib. Bu ön şəkilçi və mürəkkəb sözlərin hissəcikləri xüsusi isimlərlə birləşdiyi zaman defislə ayrılır və xüsusi isimlər böyük hərflə başlayacaq. Məsələn, anti-Rusiya, trans-Asiya, trans-Avropa, trans-Avrasiya, trans-Qafqaz, proto-Azərbaycan və s.
Qeyri və ümum morfemləri xüsusi isimlərlə birləşdiyi zaman defislə ayrılır və xüsusi isimlər böyük hərflə başlayacaq. Məsələn, qeyri-Avropa, ümum-Azərbaycan, ümum-Avropa,ümum-Bakı, ümum-Rusiya, və s. Azərbaycan Respublikasının Kənd Təsərrüfatı naziri, Azərbaycan Respublikasının Səhiyyə naziri tipli mürəkkəb adlarda sahə bildirən söz (Səhiyyə) böyük, vəzifə bildirən söz (nazir) kiçik hərflə yazılacaq”.
T.Şükürlünün sözlərinə görə, tərkibində lisey, gimnaziya, vəqf, məktəb, fakültə, şöbə sözləri olan mürəkkəb adlarda ilk söz böyük, sonrakı sözlər kiçik hərflə yazılacaq. Məsələn, Avropa liseyi, Dəyanət vəqfi, Humanitar fənlər gimnaziyası, Humanitar siyasət məsələləri şöbəsi, Uşaq-gənclər şahmat məktəbi, BDU-nun Filologiya fakültəsi, Nəsimi adına Dilçilik İnstitutunun Tətbiqi dilçilik şöbəsi.
Fəxri adların özək hissəsini təşkil edən ilk söz böyük hərflə, sonrakı söz kiçik hərflə yazılır: Azərbaycan Respublikasının Əməkdar müəllimi, Azərbaycan Respublikasının Əməkdar incəsənət xadimi, Azərbaycan Respublikasının Xalq şairi və s.