Biz də problemlə üzləşirik, gəlirlər azalıb” - Prezident Davos üçün yazdı

Xəbər verdiyimiz kimi, Davos İqtisadi Forumunun rəsmi saytında Azərbaycan Prezidenti İlham Əliyevin "2017-ci ildə Azərbaycan iqtisadiyyatının prioritetləri" adlı məqaləsi dərc olunub. "Qafqazinfo" forumun rəsmi saytına istinadən dövlət başçısının məqaləsini ixtisarla təqdim edir:
"Azərbaycanın bugünkü uğurları son illər hərtərəfli, konkret və məqsədyönlü səylərin nəticəsidir.
Bu gün bizim iqtisadi siyasətimiz üçün prioritet qeyri-neft sektorunun inkişaf etdiyi bir vaxtda iqtisadiyyatın daha da şaxələndirilməsidir.
Bizim nailiyyətlərimiz hiss olunan və görünəndir, amma biz də problemlərlə üzləşirik. Davam edən qlobal iqtisadi böhran Azərbaycan iqtisadiyyatına da təsirsiz ötüşməyib, gəlirləri azalıb və ötən il ərzində milli valyutanın 10.1% devalvasiyasına gətirib çıxarıb. Buna baxmayaraq, biz uğurla müvafiq tədbirlər həyata keçirərək bu problemləri aradan qaldırırıq. Daha davamlı inkişafın təmin edilməsi üçün strateji yol xəritəsi qəbul olunub; kompleks struktur, institusional, valyuta, maliyyə və digər islahatlar davam etdirilir; vergi və gömrük idarəetməsi yaxşılaşıb və bütün sahələrdə şəffaflıq təmin olunur. Məsələn, ötən ilin 10 ayı ərzində ticari dövriyyənin azalmasına baxmayaraq, gömrük yığımları 53 faiz artıb.
Azərbaycanın gücü təkcə onun iqtisadiyyatında deyil. Azərbaycan çoxmillətli ölkədir. Müxtəlif etnik qrup və konfessiyaların nümayəndələri burada əsrlər boyu sülh, qarşılıqlı anlaşma və dialoq şəraitində yaşayıb.
Mən əminəm ki, 2017 Azərbaycan üçün iqtisadi inkişaf ili olacaq. Biz səmərəli iqtisadi islahatlar həyata keçirməyi davam etdirəcəyik. Eyni zamanda, sosialyönümlü təşəbbüslər üçün xərcləri artıracağıq.
İqtisadiyyatımızın şaxələndirilməsi, demək olar ki, başa çatıb. Hazırda bizim ümumdaxili məhsulun 70% -i qeyri-neft sənayesindən gəlir. Əsas hədəfimiz bu gün ixracın şaxələndirilməsidir. 2016-cı ildə görülən tədbirlər bu məqsədin həyata keçirilməsinə gətirib çıxaracaq. Artıq Azərbaycan Dünya İqtisadi Forumun Qlobal Rəqabət İndeksində 37-ci yerdədir və biz bu uğurları möhkəmləndirmək əzmindəyik”