GÖYÇAYIN İCRA BAŞÇISINDAN ŞİKAYƏT VAR

Göyçayın icra başçısı Mehdi Səlimzadənin Füzuli və Cəbrayılın işğalı günündə rəhbərlik etdiyi rayonda genişmiqyaslı konsert təşkil etməsi geniş ictimai rezonans doğurmuşdu. Bu hadisəyə münasibət bildirərkən Müasir Müsavat Partiyasının (MMP) sədri Hafiz Hacıyev icra başçısı haqda sərt ifadələr işlətmişdi: “Göyçayın icra başçısı Mehdi Səlimzadə bu xalqı, ölkəni və ölkə başçısı İlham Əliyevi saymır”.
Partiya sədrinin açıqlamasında bildirdiyinə görə, M.Səlimzadə Dağlıq Qarabağı unutdurmağa çalışır: "İşğal günlərində məmurlarımız təmtəraqlı ad günləri qeyd edirlər. Bununla da xalqa qıcıq verirlər. Yəni demək istəyirlər ki, ey xalq, biz sizi saymırıq. Siz bizim nökərimizsiniz. Yəni sadə, sivil vətəndaşa 3-cü sort varlıq kimi baxırlar. Millətə sitəm verirlər. M.Səlimzadə bununla dövlətə və dövlət başçısına sataşır. Bunun başqa izahı yoxdur. Dövlət başçısı öz ad gününü gedib qaçqınlarla, cəbhədə əsgərlərlə keçirir. Onların dərdləri, qayğıları və problemləri ilə maraqlanır. Təssüf ki, ərazilərimizin işğalı günündə təmtaraqlı ad günü keçirməkdən və konsert düzənlətməkdən çəkinmirlər... Bu adam Prezidentə qarşı çox böyük xəyanət yolu tutub. Xalqla Prezident arasında uçurum yaradır. Düşünürəm ki, onun davranışları yaxşı sonluqla nəticələnməyəcək”.
Həmin hadisədən təxminən il yarım vaxt keçib. M. Səlimzadə rayon rəhbəri vəzifəsindədir. Əgər rayonun bütün problemlərinin həllinə nail olsaydı, Göyçay vətəndaşlarının rifahı naminə nəzərəçarpan işlər görsəydi, bir sözlə, xalqı xoş günə çıxarsaydı, elədiyi çal-çağıra müəyyən dərəcədə haqq qazandırmaq olardı, amma...
Göyçay şəhərinin Heydər Əliyev prospekti - 209 ünvanda yaşayan Rəhimova Validə Mahmud qızı redaksiyamıza müraciət edərək, rayon rəhbərliyinin onun problemlərinə laqeyd qalmasından gileylənir. Yazır ki, biganə qalması bir yana, üstəlik, məmurlar ona müxtəlif vasitələrlə təzyiqlər göstərirlər.
Vətəndaş Rəhimova övladının xəstəliyi, qəyyumu olduğu daha iki uşağın problemləri ilə əlaqədar RİH başçısına müraciət etdiyini bildirir: "Lakin icra başçısı mənə boş və yalan vədlər verərək, aldadıb. Üstündən çox keçməmiş müxtəlif dövlət nümayəndələrini mənim üstümə göndərdi. Şikayətlərimə baxılmaq əvəzinə mənə yeni problemlər yaratdılar. Nəticədə su ilə təminatım kəsildi. Həll etmək istədiyim problemlər bir yana, İcra Hakimiyyətinin mənə yaratdığı çətinliklərdən yaxa qurtara bilmirəm".
Xatırladaq ki, bu qeyd etdiklərimiz M. Səlimzadənin milli - mənəvi dəyərlərə hörmətsiz yanaşmasına dəlalət edən çoxsaylı misallardan yalnız bir neçəsidir. Təxminən ay yarım öncə KİV-də görkəmli Azərbaycan şairi Əli Kərimin oğlu, filologiya elmləri doktoru Paşa Əlioğlu Göyçay şəhərinin icra başçısı tərəfindən atası şair Əli Kərimin qəbri yerləşən parkın adının dəyişdirilərək şəhər parkı qoyulması ilə bağlı Azərbaycan Respublikasının Prezidenti İlham Əliyevə müraciəti dərc edilmişdir. Müraciətdə bildirilir ki, şəhərin icra başçısı Mehdi İldırım oğlu Səlimzadə yaxın vaxtlarda Əli Kərimin qəbrini oradan götürmək fikrindədir. P.Əlioğlu şəhərin icra başçısının bu addımını Azərbaycan poeziyasının inkişafında mühüm xidmətləri olan, həyatdan vaxtsız getmiş şairin xatirəsinə hörmətsizlik kimi dəyərləndirmişdir. O, az qala bütöv bir nəslin Əli Kərimin “Qaytar, ana borcunu” şeiri ilə böyüdüyünü vurğulamışdır: “Bu gün belə bir şairi qəbirdə də rahat yatmağa qoymurlar. Kimlərinsə parka gözü düşüb, oranı əyləncə yerinə çevirmək istəyirlər. Mənəvi dəyərləri pula qurban vermək olmaz”,- deyə şairin oğlu əlavə etmişdir. Paşa Əlioğlu demişdir ki, Əli Kərim adına park ümummilli liderimiz Heydər Əliyevin birinci hakimiyyəti dövründə Nazirlər Kabinetinin qərarı ilə salınmışdır. “Nə haqla Göyçay rayonunun icra başçısı belə bir hərəkətə yol verir. Şairin parkın girəcəyində qoyulmuş heykəli götürülərək parkın küncünə atılmışdır. Xatırladıram ki, parka Əli Kərimin adının verilməsi də, orada qəbrin yerləşməsi də həmin qərarda vardır”.
Paşa Əlioğlu sonda haqqın öz yerini tutacağına, Azərbaycanın milli- mənəvi dəyərlərinə xüsusi həssaslıqla yanaşan möhtərəm Prezidentimiz İlham Əliyevin və birinci vitse-prezident Mehriban Əliyevanın məsələyə müdaxilə edəcəyinə, ədalətin bərpa olunacağına inandığını bildirmişdir.

Ceyhun Dadaşov