QƏLBLƏRDƏ ÖZÜNƏ “YAXŞILIQ ABİDƏSİ” QURAN HEYKƏLTƏRAŞ

(nekroloq əvəzi)
Həqiqəti özünə həyat prinsipi seçən Gülpaşa Ağaməliyevin ən böyük mükafatı İnsana, İnsanlığa dəyər verə bilən, qədirşünas dostlarının, qohumlarının, həmkarlarının məhəbbət rəmzinə bənzəyən qəlblərində özünə taxt qura bilməsiydi.
Bu yaxşılıq mücəssəməsi böyük dost, böyük insan ətrafında olan gənclərin həyatda və cəmiyyətdə düzgün yer tutmaları üçün öz köməyini heç kimdən əsirgəməyib. Duruşundan, baxışından insanlıq tökülən bu adam yaxşılıq heykəliydi. Ancaq o heykəli kimsə qoymayıb ondan ötrü. Allahın lütfüylə öz əlləriylə, gözəl əməlləriylə, dövlətçilik eşqiylə, milli ruhuyla özü ucaldıb.
Ağaməliyev Gülpaşa Əlipaşa oğlu Azərbaycanda Əzim Əzimzadə adına Bakı Rəssamlıq Məktəbini (hazırki Azərbaycan Rəssamlıq Akademiyası nəzdində İncəsənət Kollecini) “Rəsm və rəsmxət müəllimi” ixtisası üzrə bitirmiş, sonra Ukraynada Rəssamlıq və Heykəltəraşlıq İnstitutunda ali təhsil almışdır. Bir neçə il müəllim işlədikdən sonra 8 nömrəli Trestin nəzdindəki “SU – 85” tikinti idarəsində müxtəlif vəzifələrdə çalışmışdır. Təqaüdçü idi.
Xoşbəxtlər üçün ən uzun ömür də bir gün qədər qısadır, bədbəxtlər üçün isə bir gecə də əzablı ömür qədər uzundur. Gülpaşa müəllim də o xoşbəxtlərdən idi ki, ömrünün hər gününü dolğun, mənalı və düzgün yaşadı. Allah-Təala heç bir bəndəsini xoşbəxt və ya bədbəxt yaratmır. Hər kəs yaşadığı həyatda tutduğu mövqe və gördüyü işlərlə bunlardan birini qazanır. Çünki hər kəs ömür adlı yolda öz yükünü daşıyır. Gülpaşa müəllimin də tale yükü insanpərvərlik, xeyirxahlıq və düzgün amal uğrunda getdiyi məqsəd idi. Həyat keçən günlərlə deyil, yaddaqalan günlərlə xatırlanır. Gülpaşa müəllim da məhz belə xatırlanan insanlardandı.
Əbədi yaddaşlarda qalan isə hər kəsin qazandığı savablar, özündən sonra qoyub getdiyi əməlləridir. O əməllər ki, sönmüş ocaq kimi tüstüsü olmasa da, hər zaman qəlbdə qığılcım kimi közərəcək. Gülpaşa müəllimin də savab dolu xeyirxah əməlləri onu dostlarının, tanışlarının, doğma və əzizlərinin qəlbində daim yaşadacaqdır.
Ölmək deyil, sağ olub yaşamamaq qorxuludur. Gülpaşa Ağaməliyev sağlığında dostlarının, yaxınlarının sevimlisi, öldükdən sonra isə onu tanıyanlıarın qəlbinin bəzəyi, şirin xatirəsi oldu. Qoy ulu Tanrı onun qəbrini nurla doldursun, ruhunu şad etsin.

Mahizər Qəribova