Mənli günlərini yada salarsan

Hərdən gələr olsan məzarım üstə,
Əlində dağlardan gül gətirərsən.
Gülləri, çiçəyi bağlayıb dəstə,
Dağlardan gözündə sel gətirərsən.


Baş daşımı dəsmalınla silərsən,
Baxarsan şəklimə, acı gülərsən.
Onda mənsizliyi yaxşı bilərsən,
Deyib ağlamağa gül gətirərsən.

Boylana-boylana tənha qalarsan,
Təsəllini sən rəsmimdən alarsan.
Mənli günlərini yada salarsan,
Ağlayıb, ağlayıb yatarsan mənsiz.

Məzahir


(Zəngilan torpağının ləyaqətli övladı Zəminə Məhərrəmova ilə mətbuatdan tanışam, illərin yaxın dostlarıyıq. Bu yaxınlarda eşitdim ki, bacısı Nailə xanım dünyasını dəyişib. Allahdan rəhmət dilədim. Üstündən bir müddət keçdikdən sonra Zəminə xanım bildirdi ki, yeznəsi Məzahir bəy həyat yoldaşına şeir həsr edib, öz sevgisini misralarla qeyd edib və onsuzluğu bir an belə unuda bilmir. Bu şeirinin mətbuatda çap edilməsini istəyir. Budur, həmin şeiri Zəminə xanımın xahişilə çap edirik. “Korrupsiya və Qanun” qəzetinin baş redaktoru Xuraman xanım Quliyevaya öz adımdan təşəkkürümü bildirirəm.)

Təqdim etdi: Daşdəmir ƏJDƏROĞLU