KİRAYƏDƏ "YAŞAYAN" ÇEMPİON

Son vaxtlar ölkəmizdə ciddi hiss edilməyə başlayan maliyyə böhranı bu vaxta qədər kifayət qədər prestijli və maddi təminat baxımından sabit sahə sayılan idmana da sirayət etməyə başlayıb. Xatırlayırsınızsa, keçən ay respublikamızın bir neçə adlı-sanlı, beynəlxalq arenalarda, mötəbər turnirlərdə uğurlar qazanmış güləşçisi maaşlarının verilməməsinə görə etiraz aksiyası keçirdilər. Bu yaxında xəbər yayıldı ki, artıq onların maaşlarının ödənilməsinə başlanılıb. Azərbaycanlı yüngül atlet Ramil Qurbanov Türkiyəni təmsil edərək dünya çempionu olandan sonra məlum oldu ki, onun 2011-ci ildə ölkəmizdən getməsinin səbəbləri sırasında birincisi maddi təminat problemiymiş. Hazırda Azərbaycanda çox sayda perspektivli idmançı var ki, maddi sıxıntı içində yaşayırlar. Bakı şəhəri Türkan qəsəbəsi Üzümçülük sovxozu ərazisində yaşayan Musayev Şahin Asif oğlu redaksiyamıza müraciət edib. Boks üzrə dəfələrlə Azərbaycan və beynəlxalq miqyaslı yarışların qalibi olan boks üzrə respublika çempionatında qızıl, Avropa çempionatında bürünc medal qazanıb. Amma üçrəngli bayrağımızı yüksəkliyə qaldıran, himnimizi səsləndirən idmançımızın ciddi problemi var. Dörd nəfərlik ailə üzvləri ilə birlikdə kirayədə yaşayır. Yazır ki, dəfələrlə Xəzər Rayon İcra Hakimiyyəti başçısına məktub yazıb. Çifayda, rayon rəhbərliyindən çempionumuzun acınacaqlı həyat tərzi ilə maraqlanan olmayıb. Ən nəhayət, ölkə Prezidentinə müraciət edib, cavab gözləyir. Redaksiyadan isə bu probleminin ictimailəşdirilməsini və aidiyyəti qurumların diqqətinə çatdırılmasını xahiş edir.