KİV: İsrail Livan ərazilərinin bir hissəsini Beyruta qaytarır

Yaxın günlərdə İsrail hökuməti yəhudi dövlətinin ordusu tərəfindən tutulan Livan ərazilərinin bir hissəsi üzərində nəzarəti Beyruta qaytarmağı planlaşdırır.

Bu barədə CNN telekanalı ABŞ administrasiyasındakı anonim mənbəyə istinadən məlumat yayıb.

"Hazırda İsrailin nəzarətində olan ilk "pilot zona" bir neçə gün ərzində Livanın idarəçiliyinə veriləcək. Növbəti pilot zonalar artıq xəritələrdə müəyyənləşdirilib. ABŞ Silahlı Qüvvələrinin Mərkəzi Komandanlığı (CENTCOM) bu istiqamətdə irəliləyiş əldə etmək üçün hər iki dövlətlə əməkdaşlıq edir", - deyə məlumatda qeyd olunub.

ABŞ administrasiyasının nümayəndəsi onu da vurğulayıb ki, Birləşmiş Ştatlar Livan hökumətinə həm həmin ərazilərdə, həm də bütövlükdə ölkə miqyasında suverenliyini tam bərpa etməkdə dəstək olmaq məqsədilə tezliklə beynəlxalq tərəfdaşlarla əlaqə qurmağa başlayacaq.

Qeyd olunur ki, gələn həftə Romada tərəflərin nümayəndələri arasında bu məsələ ilə bağlı qapalı formatda danışıqlar baş tutacaq.