Bakıda məşhur şadlıq sarayının ərazisində 30 ağac kəsildi

Bakı şəhərinin Nizami rayonunda yerləşən “Neolit City” şadlıq sarayının ərazisində ağacların kəsilməsi ilə bağlı Ekologiya və Təbii Sərvətlər Nazirliyinə daxil olan şikayət yerində araşdırılıb və fakt təsdiqini tapıb.
ETSN-in mətbuat xidmətindən bildirildiyinə görə, araşdırma zamanı Nizami rayonu, Mikayıl Əliyev küçəsi, 3 ünvanında yerləşən “Neolit City” şadlıq sarayının ərazisində 30 müxtəlif cinsli ağacın kəsildiyi və təbiətə 37 380 manat məbləğində ziyan dəydiyi müəyyən edilib.
Faktla bağlı akt tərtib olunub.
Dəymiş ziyanın məbləği cinayət tərkibi yaratdığından, məsələyə hüquqi qiymət verilməsi və təqsirkar şəxslər barəsində qanunamüvafiq tədbirlərin görülməsi üçün toplanmış sənədlər Baş Prokurorluğa göndərilib.
ETSN yaşıllıqların mühafizəsinə qayğıkeş və həssas münasibət göstərən vətəndaşlara təşəkkürünü bildirib.