"Mənim ən mədəniyyətsiz saydığım ailəsinin boşanma məsələsini televiziyaya çıxaranlardır"

Televiziyalarımızı hər dəfə bayağı, əttökən verilişlər yayımlamaqda ittiham edirik. Amma bəzən elə olur ki, buna səbəb elə biz özümüz oluruq. Yaxşı olar ki, günahı özümüzdə də görək.
Bölgələrimizdəki toy adətlərinin efirlərimizdə yayımlanmasını kəskin tənqid edən millət vəkili, yazıçı Aqil Abbas Moderator.az-a açıqlamasında bunun günahkarının elə özümüz olduğunu bildirdi:
“Belə toy adətlərinin televiziyada yayımlanmasına özümüz səbəbkarıq, burda kanalların heç bir günahı yoxdur. Televiziyalar reklamla işləyən təşkilatdır. Özəl televiziyalar var ki, dövlət tərəfindən maliyyələşmirlər və ona görə də onlar məcburdurlar ki, pul qazansınlar. Aldığım məlumata görə özəl televiziyaların bir çoxu işçilərinə əmək haqqı verə bilmir. Öz toylarını efirlərə çıxaranların ağılı ora qədər işləyir. Keçmişdə iki gün toy olurdu və orda da bir adam oxuyurdu. İndi bir toya iyirmi müğənni gətirib oxudursa, xərc çəkirsə, bu həmin adamların özünün səhvidir və onların toyuna da heç kim baxmır. Toyda yalnız hoppanıb düşürlər. Mən də belə şeylərin şahidi olanda əsəbiləşirəm. Televiziyanı çağırıb ki, oğlumun toyudu, onu-bunu öpür, kababın da tüstüsü ekrandan adamın üzünə vurur. Mənim ən çox səhv və mədəniyyətsiz saydığım ailəsinin boşanma məsələsini televiziyaya çıxaran adamlardı. Adam ailəsinin sirrini nə qonşusuna, nə də qardaşına demir. Biz indi hansı zəmanədə yaşayırıq ki, bunları on milyon insanın qarşısına çıxarırıq. Bəs bu türkçülük, millətçilik, Azərbaycan ailəsi, xalqı necə oldu?”.
A.Abbas belə verilişlərə çıxanların dövlət strukturlarını da hörmətdən saldıqlarını bildirdi:
“Televiziyalarımız artıq həm məhkəmədir, həm prokurorluqdu, həm də polisdir. İnsanlar getdikcə savadsızlaşıb cahilləşir. Cahilləşəndə də axırı belə olur. Ailə məsələsi ilə bağlı dövlətin müvafiq strukturları var, ora müraciət etmək lazımdır. Bunlar isə bu gün çıxıb televiziya kanallarında məhkəmə qururlar və deyirlər ki, televiziya işə qarışdığı üçün polis bu məsələni həll etdi. Adamdan soruşarlar ki, sən polisə müraciət etmişdinmi? Niyə polisi, prokurorluğu hörmətdən salırsınız?! Elə dövlət kanallarımız var ki, orda hüquqla bağlı ağıllı məsləhətlər verirlər, amma bunlara baxan yoxdur”