İnterpol Boris Nemtsovun qətlinin təşkilatçısını axtarır

İnterpol məşhur siyasətçi Boris Nemtsovun qətlinin təşkilatçısı olduğu ehtimal edilən 29 yaşlı Rusiya vətəndaşı Ruslan Muxudinov barəsində axtarış elan edib.

Virtualaz.org RİA Novosti-yə istinadən bildirir ki, bu barədə Beynəlxalq Cinayət Polisi Təşkilatının saytında məlumat yerləşdirilib. Məlumatda bildirilir ki, R. Muxudinov qətl və odlu silahların qanunsuz dövriyyəsində günahlandırılır.

Qeyd edək ki, B. Nemtsov 28 fevral 2015-ci ildə Moskvanın mərkəzində qətlə yetirilib. B. Nemtsov 1990-cı illərdə Rusiya hökumətində yüksək vəzifələr tutub, 2000-ci ildə isə müxalif düşərgəyə keçib.

Qətllə bağlı ilkin istintaq başa çatıb və qətldə iştirakda təqsirləndirilən 5 nəfərə ittiham elan edilib. Qətlin sifarişçisi və təşkilatçısı ilə bağlı istintaq davam edir. Qətlin təşkilatçısının R. Muxudinova olduğu ehtimal edilir.