Zaqatalada canavar əsgərə hücum çəkdi, kürəyini dişlədi

Zaqatalada yeniyetmə canavar hücumuna məruz qalıb.
Zaqatala Mərkəzi Rayon Xəstəxanasından (MRX) verilən məlumata görə, rayonun Aşağı Çardaqlar kənd sakini, 2001-ci il təvəllüdlü Məhəmməd Ramiz oğlu Məmmədov kəllənin gicgah nahiyəsinin dişlənmə xəsarəti ilə xəstəxanaya daxil olub. Məlum olub ki, Məhəmməd Məmmədov Azərbaycanın Gürcüstanla həmsərhədində, Zaqatala rayonu Aşağı Çardaqlar kəndinin inzibati ərazisində meşə massivində ailəsinə məxsus qoyunları otaran zaman qəfildən canavarın hücumuna məruz qalıb. O həkimlərə bildirib ki, yaxınlıqdakı ağaca çıxmaqla canavarın əlindən qurtara bilib.
Ona quduzluq əleyhinə iynə vurulub, vəziyyəti normaldır.
Qeyd edək ki, eyni canavar daha sonra ərazidə hərbi xidmətdə olan, Zaqatala DSX-nın əsgəri B.Əsgərova hücum edərək onun kürək nahiyəsini dişləyib. Hər iki şəxsə lazımi tibbi yardım göstərilib, quduzluq əleyhinə peyvənd olunublar.