"Neftçi" Portuqaliya klubunun futbolçusunu transfer edir

"Neftçi" klubu yeni transfer hədəfini müəyyənləşdirib.
"ağ-qaralar" hazırda "Santa Klara" klubunun şərəfini qoruyan yarımmüdafiəçi Qustavo Klismanın xidmətində maraqlıdır.

Qeyd edək ki, braziliyalı futbolçu 2025-ci il ərzində icarə əsasında Yaponiyanın "Vissel Kobe" komandasında çıxış edib. İyirmi altı yaşlı futbolçunun "Santa Klara" ilə mövcud müqaviləsi növbəti ilin yay aylarında başa çatır. Məhz bu səbəbdən "Neftçi" bu keçidi həll etmək üçün Portuqaliya təmsilçisinə təzminat ödəmək məcburiyyətindədir.

Məlumata görə, portuqaliyalılar Klismanın transferindən minimum 500 min, maksimum isə 1 milyon avro aralığında gəlir əldə etməyi planlaşdırırlar.

Xatırladaq ki, Qustavo Klisman "Santa Klara" forması ilə çıxış etdiyi iki mövsüm ərzində ümumilikdə 74 qarşılaşmada meydanda olub. Bu oyunlarda o, rəqib qapılarından 3 top keçirib və 7 məhsuldar ötürmə ilə yadda qalıb.