Xarici diplomatlar Azərbaycan dilini öyrənir

Nazirlər Kabineti yanında Tərcümə Mərkəzində Azərbaycanda yaşayan xarici vətəndaşların Azərbaycan dilini düzgün və rahat mənimsəməsi məqsədilə dil kursları fəaliyyət göstərir.
"Korrupsiya və Qanun" saytıtnın aldığı məlumata görə Mərkəzdən "Report"un sorğusuna cavab olaraq bildirilib ki, kurslara xarici ölkələrin Azərbaycandakı fövqəladə və səlahiyyətli səfirliklərinin əməkdaşları, müxtəlif xarici qurumların Azərbaycanda fəaliyyət göstərən nümayəndələri, xarici şirkətlərin rəhbərləri və işçiləri, eləcə də Azərbaycan dilini öyrənmək həvəsində olan digər əcnəbi şəxslər maraq göstərir.
Kurslara birinci mərhələdə Kuba, Serbiya, İspaniya Respublikalarının, Niderland Krallığının ölkədə fəaliyyət göstərən fövqəladə və səlahiyyətli səfirləri, həmçinin, digər səfirliklərin əməkdaşları qatılıb.
İkinci mərhələdə dərslərdə Avstriya Respublikasının Azərbaycandakı konsulu və səfir müavini, Braziliya səfirliyinin əməkdaşları, Bakıda yaşayan bir neçə Braziliya vətəndaşı və Pakistan səfirliyinin hərbi ataşşesi iştirak edir.
Kurslara ən çox maraq göstərən qeyri-rezidentlər Rusiya səfirliyinin əməkdaşlarıdır. Çoxluq təşkil etdiyi səbəbindən onlar ayrıca, böyük qrupda dərslərə qatılır.
Tərcümə Mərkəzindən bildirilib ki, kurslara Hindistan, Yaponiya, Türkmənistan və Tacikistan Respublikalarının Azərbaycanda fəaliyyət göstərən səfirliklərinin əməkdaşları və ölkədə yaşayan ayrı-ayrı vətəndaşlar da maraq göstərir, hazırda mərkəz yeni qrupların təşkili üzrə işlər aparır.
Kurslar interaktiv və praktiki formatda təşkil edilir. Dərslər, əsasən şifahi danışıq dilinin və yazı mədəniyyətinin mənimsənilməsi istiqamətində həyata keçirilir və tədris zamanı ölkəmizin mədəniyyəti, rəmzləri, xalqımızın adət-ənənələri və tarixi həqiqətlərini əsk etdirən mövzulara müraciət edilir.
Qeyd edək ki, kursların müddəti 6-12 aydır. Məşğələlər dəsr müddəti 1,5 saat olmaqla, həftədə 2 dəfəTərcümə Mərkəzinin inzibati binasında keçirilir.