Seçkilərdə qalib gələn namizədlərə deputat statusu nə vaxt veriləcək?

“Noyabrın 1-də Milli Məclisə keçirilən seçkilərin nəticələrinin müəyyən olunmasına dair Dairə Seçki komissiyalarının protokollarının birinci nüsxəsi və ona əlavə olunan müvafiq sənədlər Mərkəzi Seçki Komissiyasına (MSK) təqdim olunub”.
"Korrupsiya və Qanun" qəzetinə istinad olaraq bu barədə Publika.az-a MSK Katibliyinin Media və İctimai əlaqələr şöbəsinin müdiri Şahin Əsədli məlumat verib.
Onun sözlərinə görə, bununla da seçkilərin yekunlarına dair protokolların tərtib olunması prosesi başa çatıb. Ş.Əsədli deyib ki, MSK bundan sonra ən geci 20 gün müddətinə seçkilərin nəticələrini yoxlayaraq, bu prosesə tam yekun vurur: “Bu müddətdən sonra Konstitusiya Məhkəməsi MSK tərəfindən təqdim olunan sənədləri 10 gün müddətinə yoxlayaraq təsdiq edəcək. Artıq Konstitusiya Məhkəməsi bu barədə yekun qərar qəbul edəndən sonra seçkilərdə qələbə qazanan şəxslər deputat statusu alacaqlar. Əgər Konstitusiya Məhkəməsi yoxlama prosesi tələb edərsə, həmin müddət artırıla bilər”.